Piştî ku şandeya Wezareta Karên Hundir a hikumeta demkî gihîşt Hesekê, civîna Hêzên Ewlekariya Hundirîn a bi şandeyê re dest pê kir.
Şandeyeke Wezareta Karên Hundir a hikûmeta demkî ya Sûriyeyê di çarçoveya pêkanîna peymana 30yê Çileyê de ya di navbera HSD û hikumeta demkî de îro derbasî Hesekê bû.
Li gorî nûçeya ANHAyê; şande bi Asayîşa Kantona Cizîrê re berê xwe da avahiya Trafîkê ya bajêr. Civîn ji çapemeniyê re girtî hate lidarxistin.
Beriya ku civîn dest pê bike, rêveberê Hêzên Ewlekariya Hundirîn a Parêzgeha Hesekê yê ji aliyê hikumeta demkî ve hatiye tayînkirin Merwan El Elî û rêveberê Asayîşa Bakur û Rojhilatê Sûriyeyê Mehmûd Xelîl Elî bersiva pirsên rojnamegeran dan.
Mehmûd Xelîl Elî ku bi navê Siyamend Efrîn tê naskirin diyar kir ku ew peymana di navbera HSD û hikûmeta demkî de bi cih tînin û got ku armanca vê peymanê rawestandina şer û rêgirtina li pêşiya herikîna xwînê di navbera her du aliyan de ye. Xelîl Elî her wiha anî ziman ku şer zirarê dide her du aliyan jî.
Mehmûd Xelîl Elî bi bîr xist ku gelê Rojava ji sala 2011an ve zêdetirî 22 hezar canê xwe ji dest dane û zêdetirî 30 hezar kes di şer de birîndar bûne û got: “Wê xwîna wan şehîd û birîndaran vala neçe.”
Xelîl Elî da zanîn ku ji bo xebatên entegrekirinê komîteyek hatiye avakirin û ev komîte hatiye herêmê da ku entegrasyonê temam bikin, piştre vegere cihê xwe.
Rêveberê Hêzên Ewlekariya Hundirîn ê Parêzgeha Hesekê Merwan El Elî jî got: “Ez bawer dikim ku ev hevdîtin dê nakokiyan ji holê rake. Rojên pêş dê teqez aramiyê pêk bîne.”
Piştî bersiva pirsên rojnamegeran civîn ji çapemeniyê re girtî dest pê kir.
