HDê bi tevlîbûna Berdevka DEM Partî Aysegul Dogan, Endama MYKê ya EMEPê Sukran Dogan û Cigirê Serokê Giştî yê Partiya DEVA Îdrîs Şahîn panela “Aştî û Demokrasiyê” li dar xist.
Komeleya Mafê Mirovan (ÎHD), li eywana Sabahattin Ali ya Navenda Hunerê ya Dogan Taşdelen a navçeya Çankaya ya Enqere panela “Aştî û Demokrasî” li darxist. Di panelê de Hevserokê Giştî yê ÎHDê Huseyîn Kuçukbalaban moderetorî kir. Berdevka DEM Partî Aysegul Dogan, endama MYKa ya Partiya Kedê (EMEP) Sukran Dogan û Cigirê Serokê Giştî yê Partiya DEVA Îdrîs Şahîn jî axivîn. Di panelê de ewilî hevserokê Giştî yê ÎHDê Huseyîn Kuçukbalaban axivî. Huseyîn Kuçukbalaban diyar kir ku di Pêvajoya Aştî û Civaka Demokratîk de tevî gavên cidî hatine avêtin jî, lê mixabin dewlet hêj polîtîkayên ewlekariyê terk nekiriye û got: “Di aliyê aştî demokrasiyê de hêj gavên şênber nehatiye avakirin.”
‘Divê desthilat gavên pêwist bavêje’
Piştre Cîgirê Serokê Giştî yê Partiya DEVAyê Îdrîs Şahîn axivî û anî ziman ku tevî 11 meh ji ser pêvajoyê re derbasbûnê jî hê jî desthilatê gavên pêvîst neavêtine û got: “Dewleteke bihêz û demokratîk divê daxwazên her kesî bicîh bîne. Ger guhertineke qanûnî hewce be qanûnî, ger guhertineke destûrî hewce be destûrî. Ji bo ku em aştiyê bibînin, divê em şertên jiyana mirovane bicîh bînin û dîwarên di navbera taxan de rakin. Rêya vê jî ew e ku em bi welatiyên welêt re bi edaletî tevbigerin. Lê em hêj vê dilsoziyê nabînin.”
‘Têkoşîna demokratik wê berdewam bike
Endama MYKê ya EMEPê Sukran Dogan jî destnîşan kir ku piştî serkeftina vê pêvajoyê jî têkoşîna demokratîk wê berdewam bike û got: “Ji bo firehkirina sînorên qada têkoşîna siyasî jî em ê têbikoşin. Em serdana grev û çalakiyên karkeran dikin û karkêr dibêjin berê jî ev hewldan bêencam man, dîsa wisa bibe. Dibêjin, ‘Gelo destûr wê bê guhertin?’ Pirs dikin, ‘Bandora partiyên muxalîf li komisyonê heye?’ Piraniya wan dibêjin ku baweriya wan bi komisyonê tune ye, ji ber ku bi giştî bi Meclisê jî baweriya wan tune ye. Ew dixwazin xebatên komisyonê bileztir bibin û gavên pratîk bêne avêtin. Ew dibêjin ku divê ji bo çekberdanan rêziknameyên qanûnî bêne kirin, girtiyên nexweş bên berdan.”
‘Pirsgirêka Kurd pirsgirêka kurdî ye’
Herî dawî jî berdevka DEM Partî Aysegul Dogan axivî. Aysegul Dogan bi lêv kir ku mijar pirsgirêka pergalê ye û wiha axivî: “Birêz Abdullah Ocalan bang kir û PKKê jî xwe fesîh kir û çekên xwe şewitandin. Lê dewletê hê jî gav neavetine. Niha jî em hatin qonaxa avakirina komîsyonê.Birêz Abdullah Ocalan aktorekî girîng e pêvajoyeyê. Divê komîsyon bi birêz Abdullah Ocalan re jî hevdîtin bike. Ev komîsyon ne weke komisyona ji salên 2013an e. Cara yekem di komîsyonê de civak sedî 90 tê temsil kirin. Lê em dibêjin, navê komîsyonê de biratî heye lê ew çawa biratiyê. Komîsyon nehelê ku dayikên aştiyê di komîsyonê de bi Kurdî biaxivin ew çawa biratiye. Pirsgirêka Kurd pirsgirêka Kurdî ye. Divê mijar rast were destgirtin. Mijar ne ewlehî an jî terore. Divê mijar rast be dest girtin ku çareser bibe. Lê mixabin komîsyonê hê rêyeke ku da ye ber xwe tune ye. Ji ber wê jî em balê dikşînin sererast kirina qanûnan dikin. Peywîra komîsyonê ya çareser kirina qanûnên înkarê tune ye. Lê dikarê rê vêbike. Divê sererastkirina qanûnî bibe. Ji ber wê jî divê komîsyon piştî guhdarkirinê ji aliyê qanûnî ve çi be kirin biaxivê û rê ya xwe diyar bike.”
Piştî axaftina Aysegul Dogan rûniştina yekem a panelê bi pirs û bersivan bi dawî bû.
