Bi pêşengiya Platforma Saziyên Demokratîk a Êlihê ji bo pêvajoyê ku gav bên avêtin daxuyanî hate dayîn û hate xwestin ku tavilê gav bên avêtin û hate gotin ku pêkanîna aştiyê berpirsiyariya hemû kesî ye.
Bi pêşengiya Platforma Saziyên Demokratîk û Rêxistina DEM Partiyê ya Êlihê li Navenda Çandê ya Baharê (BKM) ya Êlihê derbarê meşa 16ê Gulanê de ku banga gavavêtinê dike, civîna çapemeniyê li dar xistin. Di civînê de rêveber û endamên DEM Partiyê û DBPê yên Êlihê, aktivîstên TJAyê, Dayikên Aştiyê, rêveberên rêxistinên sivîl amade bûn. Daxuyanî bi Kurmancî û Tirkî hate xwendin. Metna Kurmancî Hevserokê DBPê yê Êlih Resûl Çetîn û ya Tirkî jî Hevseroka DEM Partiyê ya Êlihê Semra Guneş xwend.
Metna daxuyaniyê ya bi vî rengî ye:
“15 meh di ser banga birêz Ocalan a ‘Pêvajoya Aşrî û Civaka Demokratîk’ a di 27ê Sibatê de kiribû derbas bûn. Lê heta niha desthilata heyî derbarê daxwaza israr a ji bo aştiyê ya gelê Kurd, Tirk, jin, ciwan, karker û bêkaran de hê jî gavên berbiçav neavêtine. Her çiqas komîsyona ku di parlamentoyê de hatibe damezrandin jî gelek dînamîkên civakî guhdarî kiriye û li ser pêvajoyê rapor daye. Lê daxwazên aştî û demokratîkbûnê hê jî nehatine bicîhanîn. Hêza siyasî ku helwesteke domdar a derengmayînê girtiye, divê bi lezgînî berpirsiyariya daxwazên civakê, ruhê pêvajoyê û pêkanîna vê derfeta dîrokî bigire ser xwe. Jiholêrakirina vê derengmayînê û nezelaliyê di ‘Pêvajoya Aştî û Civaka Demokratîk’ de şertê herî bingehîn ê serkeftina wê ye.
Berpirsiyarî ya me hemûyan e
Di qonaxek dîrokî ya wiha de bilindkirina têkoşîna aştî û demokratîkbûnê bi awayê herî xurt ji bo hemû dînamîkên civakî pêwîstiyek e. Aştî di heman demê de zemîna hevpar a herî xurt e ku nasname, bawerî û girêdanên siyasî yên cuda dike yek. Berpirsiyarî ya me hemûyan e ku em zemîna aştiyê berfireh bikin û xurt bikin û aştiyê civakî pêk bînin.”
Piştî daxuyaniyê civînê ji çapemeniyê re girtî berdewam kir.
