Rêxistina DEM Partiyê ya Amedê derbarê meşa ku dê di 16ê Gulanê de bi dirûşmeya “Gavek ji bo aştiyê” bê lidarxistin daxuyanî da û banga tevlibûna meşê kir û got: “Bilindkirina têkoşîna aştiyê ji bo hemû dînamîkên civakî wezîfeyeke mecbûrî ye. Berpirsyariya me hemûyan e ku em aştiyê civakî bikin.”
Rêxistina DEM Partiyê ya Amedê derbarê meşa ku dê di 16ê Gulanê de bi dirûşma “Gavek ji bo aştiyê” bê lidarxistin li avahiya DEM Partiyê ya Amedê civîna çapemeniyê li dar xist. Rêveber û endamên partiyên siyasî, saziyên sivîl ên bajêr û gelek kes tev li civînê bûn. Di daxuyaniyê de bi zaravayê Kurmancî û Tirkî pankarta “Gavek ji bo aştiyê” hat daliqandin. Metna daxuyaniyê ya bi Tirkî ji aliyê Hevserokê DEM Partiyê yê Amedê Abbas Şahîn û metna Kurmancî jî ji aliyê Hevseroka DBPê ya Amedê Rûçem Vefa Elyakût ve hate xwendin.
‘Pêvajo hatiye rawestandin’
Rûçem Vefa Elyakût bi bîr xist ku bi ser banga Rêberê Gelê Kurd Abdullah Ocalan a 27ê Sibatê de re 15 meh derbasbûye û got: “Tevî daxwaza bi israr a gelê Kurd, jin, ciwan û kedkaran, desthilatdariya siyasî hêj jî gavên şênber neavêtiye û pêvajo hatiye rawestandin.”
‘Dewlet berpirsyariyê nade ser milê xwe’
Rûçem Vefa Elyakût diyar kir ku komîsyona li Meclisê hatibû avakirin raporên xwe amade kirine lê daxwazên demokratîkbûnê nehatine pêkanîn û wiha axivî: “Dewlet û desthilatdarî bi polîtîkayên ‘taloqkirinê’ nêzî pêvajoyê dibin û ji bo jiyanîkirina derfetên dîrokî, divê desthilatdarî bi lezgînî berpirsyariyê bigire ser xwe. Rakirina vê rawestandin û nezelaliyê şertê herî bingehîn e.”
‘Aştî wezîfeyeke mecbûrî ye’
Rûçem Vefa Elyakût destnîşan kir ku aştî zemîna hevpar a hemû bawerî û nasnameyan e û wiha pê de çû: “Bilindkirina têkoşîna aştiyê ji bo hemû dînamîkên civakî wezîfeyeke mecbûrî ye. Berpirsyariya me hemûyan e ku em aştiyê civakî bikin.”
Banga meşa 16ê Gulanê
Rûçem Vefa Elyakût herî dawî banga tevlîbûna meşê kir û got: “Meş roja şemiyê saet di 19:00an de ji Zindana Amedê ya li navçeya Rezanê heta ber Plazaya AZC ya Ofîsê ya navçeya Bajarê Nû bê lidarxistin. Ji bo rakirina xitimandina pêvajoyê û ji bo xwedîderketina li aştiyê, divê hemû gelê me beşdarî meşê bibe.”
