Wan-Ciwan û jinên li taxa Xaçortê ku bikaranîna tiryakê lê zede bûye, ji bo pêşî li vê bigirin nobedê digirin. Jinên taxê diyar kirin ku êdî taxa wan ne ewle ye û banga têkoşîna li dijî tiryakê kirin.
Bikaranîna tiryakê li Kurdistanê ku ji ber polîtîkayên şerê taybet berbelav bûye, roj bi roj zêde dibe. Tiryak bi hêsanî li gelek kolanan û li taxan tê peydakirin û temenê bikaranîna wê daketiya heta neh saliyê. Li gorî Rapora 2025an a Ofîsa Tiryak û Sûcan (UNODC) a Neteweyên Yekbûyî (NY), di sala 2024an de li çaraliyê cîhanê 331 milyon kes tiryakê bi kar anîne. Ev hejmar teqabulê ji sedî 6,2yê nifûsa cîhanê dike.
Li bajarê Wanê ku li ser rêyên sereke yên bazirganiya tiryakê ye, bikaranîna tiryakê zêde bûye. Taxa Xaçort a navçeya Rêya Armûşê ya Wanê ku bi nasnameya xwe ya welatparêz tê nasîn, yek ji wan deveran e ku bikaranîn û firotina tiryakê lê berbelav bûye. Ji ber nebûna tedbîran, niştecih bi derfetên xwe nobedê digirin ku rê li ber tiryakê bigirin.
Jinên taxê ji ajansa Mezopotamyayê (MA) axivîn, diyar kirin ku êdî tax ne ewle ye û banga têkoşîna li dijî tiryakê kirin.
Jinên li taxê li dijî firotin û berbelavbûna tiryakê li gorî derfet û hêza xwe têdikoşin, destnîşan kirin ku her roj wesayîtên nenas dikevin taxa wan lê ji bo vê hêzên dewletê tu tedbîrên hewce nagirin û wiha gotin: “Dema em zarokên xwe dişînin dibistanê ji ber zêdebûna tiryakê ditirsin. Em kurd bi salan e rastî zilmê tên.Divê em dawî vê yekê bînin û piştgiriyê bidin hev; taxa me di xetereyê de ye.”
