Rêxistina DEM Partiyê ya Elbakê têkildarî îşkenceya polîsan a duh li 3 ciwanên birayên hev bûn kiriye, meşek li dar xist û xwest polîsên bersûc bên cezakirin.
Li navçeya Elbakê ya Wanê duh polîsan 3 ciwanên bi navê Fatîh, Îsmaîl û Diyar Deger ku birayên hev in, bi awayekî derqanûnî binçav kiribûn û di dema binçavkirinê de îşkence li wan kiribûn. 3 ciwanên ku hatibûn îşkencekirin, ragihandin ku wan polîsên sivîl ji ber ku li gorî rêzikên trafîkê tevnegeriyane hişyar kirine û polîsan jî li wan dane. Piştî buyerê ciwan bi malbatên xwe re çûbûn nexweşxaneyê û rapora lêdanê hilgirtibûn û dan zanîn ku ew dê derbarê polîsan de giliyê bikin.
Rêxistina DEM Partiyê ya Elbakê jî îro li navçeyê îşkenceya li 3 birayan hatiye kirin bi çalakiyekê protesto kir. Parlementerê DEM Partiyê yê Wanê Mahmût Dîndar û rêveberên DEM Partî û DBPê yên Elbakê bi tevlîbûna welatiyan li sûka navçeyê meşek li dar xistin û daxuyaniyek dan. Di daxuyaniyê de hat destnîşan kirin ku ew dê şopdarê bûyerê bin û xwestin polîsên bersûc bên cezakirin.
