Wan – Rêveberê TUHAY-DERê û endamê OHDê Halîl Kaya derbarê îşkenceya li Girtîgeha Wanê de diyar kir ku ji bilî Nevzat Oner, tedawiya girtiyên bi navê Şerîf Saribûlak û Botan Tîmur jî ji ber ferzkirina kelepçeyê tê astengkirin û bal kişand ser hewldanên provokasyonê yên li dijî pêvajoya nû.
Zext û binpêkirina mafê tenduristiyê yên li Girtîgeha Tîpa F a Wanê kûr dibin. Hat zanîn ku girtiyê siyasî yê bi navê Nevzat Oner dema birine nexweşxaneyê xwestin bi kelemçe wî tedawî bikin. Lê Nevzat Oner ev rewş qebûl nekir û tedawî red kir. Li ser vê yekê cendirmeyan li ser pêlekanên nexweşxaneyê li ber çavên welatiyan îşkence li Nevzat Oner kirin û ew bi saetan di wesayîta rîngê di hiştin. Nevzat Oner piştî îşkenceyê di rewşeke wisa de bû ku rêveberiya girtîgehê ew bi wî halî qebûl nekir û ew ji bo rapora derpkirinê careke din şandiye nexweşxaneyê.
Endamê Komeleya Hiqûqnasên ji bo Azadiyê (OHD) û Rêveberê Komeleya Piştgirî û Piştevaniya bi Malbatên Girtî û Hukumdaran re (TUHAY-DER) Halîl Kaya, derbarê bûyerên dawî yên di girtîgehê de agahiyên berfireh ji ajansa me re da.
‘Cendirmeyan pirsî tu alîgirî yan bêalî yî?’
Halîl Kaya diyar kir ku beriya rêkirina nexweşxaneyê, helwesta alîgirî li hemberî Nevzat Oner hatiye nîşandan û cendirmeyan ji wî pirsîn ka ew alîgir e yan bêalî ye. Halîl Kaya da zanîn ku dema Oner gotiye ew alîgir e, bi berteke hişk û gefxwarinê nêzî wî bûne û wiha got: “Li nexweşxaneyê jî tevî ku bijîşk diyar kiriye ku ji bo ewlehiyê tu pirsgirêk tune ye û dikarin kelepçeyê vekin, cendirmeyan ev rewş red kiriye. Dema Oner li hemberî vê rawestiya, ew ji odeya bijîşk derxistin, li ber çavê gel li ser pêlekanan derb kirin û tevî destên wî kelepçekirî bûn, li erdê kaş kirin. Lewma Oner ji zendên xwe birîndar dibe.”
‘Rêveberiya girtîgehê tîmeke din a cendirmeyan daxwaz kir’
Halîl Kaya anî ziman ku tîma cendirmeyan piştî derbkirinê Nezvat Oner di wesayîta rîngê ya bêhewa de girtine û birine girtîgehê. Halîl Kaya destnîşan kir ku ji ber giranî û diyarbûna îşkenceyê, rêveberiya girtîgehê Nevzat Oner di wê rewşê de teslîm negirtiye û ev tişt li axaftina xwe zêde kir: “Rêveberiya girtîgehê xwestiye careke din Nevzat Oner bibin nexweşxaneyê rapora derpkirinê bigire. Cendiremyên îşkence li Oner kirine xwestine wî bibin, lê rêveberiyê ev yek qebûl nekiriye û gotiye ku yên îşkence kirin hûn in û divê tîmeke din bê Oren bibin. Li ser vê yekê rêveberiyê tîmeke din a cendirmeyan daxwaz kir û wî şand nexweşxaneyê ku raporê derbkirinê bê girtin. Îdareya girtîgehê di hevdîtinên girtiyan de diyar kiriye ku ev bûyer ne ji aliyê wan ve hatiye kirin, belge û dosya amade ne û ew li benda daxwaza dozgeriyê ne.”
‘Şerîf Saribûlak û Botan Tîmur jî nayên tedawîkirin’
Halîl Kaya destnîşan kir ku sepana muayeneya bi kelepçe tenê bi Nevzat Oner re sînordar nîne û hatiye asteke sîstematîk û ev tişt anî ziman: “Girtiyê siyasî Şerîf Saribûlak jî ji ber ku ferzkirina kelepçeyê qebûl nekiriye, tedawiya wî hat astengkirin. Her wiha girtî Botan Tîmur ji ber heman ferzkirinê sê caran li ser hev nehatiye tedawîkirin û tedawiya nexweşiya çavên wî nayê kirin.”
‘Armanc provokasyon û xirabkirina pêvajoyê ye’
Her wiha Halîl Kaya bal kişand ser zêdebûna binpêkirinên li girtîgehan û axaftina xwe wiha bi dawî kir: “Li Kurdistanê û Tirkiyeyê hin klik û derdorên faşîst hene ku naxwazin hawirdoreke aştiyê, çanda demokrasiyê û hiqûqê bi cih bibe. Piştî gavên ku her çend kêm bin jî di qada hiqûqî û siyasî de têne avêtin, careke din ev derdorên aştiyê naxwazin ketin di nava tevgerê de ku sabote bikin. Dixwazin di nav girtiyên siyasî, malbatan û tevgera siyasî ya Kurd de provokasyonê biafirînin û pêvajoyê xirab bikin. Van êrîşên ku di van demên dawî de zêde bûne rasterast ji bo têkbirina pêvajoyê ye.”
