Şaredariya Bajarê Mezin a Amedê, di çarçoveya xebatên xwe yên “şaredariya gelparêz” de fabrîkeya “Nanê Gel” bi merasîmeke girseyî vekir. Hevşaredar Serra Bûcak di merasîmê de wiha got: “Em ê hewl bidin ku aboriyeke herêmî bidin jiyandin.”
Şaredariya Bajarê Mezin a Amedê fabrîkeya “Nanê Gel” li taxa Bagcilar a navçeya Rezan a Amedê bi merasîmeke girseyî vekir. Hevşaredarên Bajarê Mezin ên Amedê Serra Bûcak û Dogan Hatûn, Hevseroka Partiya Wekhevî û Demokrasiyê ya Gelan (DEM Partî) a Amedê Gulşen Ozer, Hevserokên Partiya Heremên Demokratîk (DBP) ên Amedê Ahmet Dogan û Rûçem Vefa Elyakût, parlamenter, hevşaredarên navçeyan, nûnerên saziyên sivîl û gelek welatî beşdarî merasîmê bûn.
Bernameya vekirinê bi nîşandana erbaneyê dest pê kir. Di ekrana ku li ber fabrîkayê hatibû avakirin de, dîmenên ku qonaxên hilberînê yên li fabrîkayê vedibêjin hatin temaşekirin. Di bernameyê de hevşaredarên Bajarê Mezin a Amedê Serra Bûcak û Dogan Hatûn axaftin kirin.
‘Li seranserê bajêr bi rêya 43 bufoyên “Nanê Gel” bigihêjin destê gel’
Di merasîma vekirinê de hat destnîşankirin ku ev proje ne tenê ji bo hilberîna nanê erzan e, lê di heman demê de armanc dike ku îstihdama jinan zêde bike, aboriya herêmî xurt bike û li dijî xizaniyê bibe piştgirî. Fabrîka li ser qadeke girtî ya 4 hezar û 500 metrekare hat avakirin, di nêzî 11 mehan de bi veberhênaneke 235 milyon lîreyî hat temamkirin. Tesis bi teknolojiyeke tam otomatîk hatiye sêwirandin û kapasîteya wê ya rojane wekî 100 hezar nan hat plansazkirin. Di gava yekem de dê rojane 40 hezar nan bê hilberandin û nanê 210 gramî dê bi 10 TLyî ji welatiyan re bê firotin. Nanên ku li vir tên hilberandin dê li seranserê bajêr bi rêya 43 bufoyên “Nanê Gel” bigihêjin destê gel.
‘Ev proje dê pêşî li pêşbaziya neheqiyê bigire û aboriya gundewarî zindî bike’
Serra Bucak di merasîmê de axivî û diyar kir ku ev qad di serî de wekî bazar û pirtûkxane hatibû fikirîn, lê ji ber kûrbûna krîza aborî û xizaniyê, wan biryar daye ku fabrîkeya nan ava bikin. Serra Bûcak destnîşan kir ku di qonaxa yekem de ji 60 xebatkaran 50 jin in û wiha got: “Ev proje dê pêşî li pêşbaziya neheqiyê bigire û aboriya gundewarî zindî bike. Em ê hewl bidin ku hilberînên vî bajarî, dîsa li vî bajarî belav bikin û aboriyeke herêmî bidin jiyandin.”
‘Em armanc dikin ku aşên xwe ava bikin’
Dogan Hatûn jî diyar kir ku ev fabrîka rasterast milkê gel e û ti armanceke wan a qezencê tune ye. Dogan Hatûn anî ziman ku hemû dahata tesîsê dê ji bo domdariya kargehê bê bikaranîn û got: “Heta ku gelê me ji vê xizaniyê rizgar bibe û li ser lingên xwe bisekine, ev der nayê girtin. Di pêvajoya pêş de em armanc dikin ku aşên xwe ava bikin û ar û genim jî bi gelê xwe re hilberînin.”
Piştî axaftinan, kurdeleya vekirinê ji aliyê hevşaredaran, nûnerên partiyên siyasî, saziyên sivîl ve hat birîn. Piştre li nav fabrîkeyê geriyan û nan li welatiyan belav kirin.
