Li Şirnexê li aliyekî herêmê li çûn û hatinê qedexe dikin û li aliyê din daran dibirin. Piştî gel bertek nîşanî birîna daran dan, Walîtiya Şirnexê çiyayên Gabar û Cûdî û 13 herêmên din qedexe kir.
Walîtiya Şirnexê gelek herêmên li navenda Şirnexê û navçeyên wê Cizîr, Basa, Silopiya, Qileban û Elkê weke “herêmên ewlehiya taybet” ragihand. Walîtiyê di daxuyaniyê de got ku dê qedexe ji 12ê Gulanê heta 26ê Gulanê bidome.
Herêmên hatine qedexekirin ev in: “Herêma Bestayê, çiyayên Cûdî, Gabar, Kela Memê, Kurt, Berê Derya, Mehrî, Textêreş, Kato Jîrka, Kato Marunîs, herêma Dulê û Suhurpaşalayla.”
Birîna daran didome
Li çiyayên Cûdî, Gabar û Kato yên Şirnexê û Herêma Bestayê, di bin çavdêriya leşkeran de bi destê cerdevanan dar tên birin. Derket holê ku li mezrika Kanîferşikê ya u ji salên 90î ve ji bo sivîlan qedexe ye, di bin çavdêriya leşkeran de bi destê kesên eşîra Tatarê dar tên birin. Welatiyan diyar kir ku leşker bi hinceta “ewlehiyê” çûna wan a herêmê asteng dikin.
Di dîmenên hatin bidestxistin de, li herêmê hin kesên ji eşîra Tatarê darên hatine birin li traktorên bê plake bar dikin û ji herêmê derdixin. Welatiyan bertek nîşanî birîna daran dan û gotin: “Li gundê me, nav zeviyê me dest bi birîna daran kirine. Cihê ku dar lê tên birin herêma Çemêkêşe ye.”
