Endamê rêxistina CPT ya Amerîkî Kameran Osman ragihand ku leşkerên Tirk rê li ber niştecihên 21 gundên li ser sînorê îdareya serbixwe ya Zaxoyê girtiye ku vegerin ser gundên xwe. Her wiha ji gundiyan re hatiye gotin ku ev dever dibin kontrola wan de ye û nikarin vegerinê.
Endamê Rêxistina Avakirina Aştiya Civakê ya Amerîkayê ya li Kurdistanê-Iraqê (CPT) Kameran Osman, li ser medya dijîtal têkildarî rêgiriyên artêşa Tirk ên li gundên sînorê îdareya serbixwe ya Zaxoyê, agahiyan belav kir.
Kameran Osman diyar kir ku roja 10ê Hezîranê berpirsên herêmî yên navçeya Derkar û bajarokê Batîfayê ji xelkê gundên herêmên ‘Sîndî û Gulî’ re ragihandibû ku ew dikarin di 15ê Hezîranê de serdana gundên xwe bikin ku ev 6 salin ji ber artêşa Tirk hatine valakirin.
Di dewamê de Kameran Osman da zanîn ku dema ku gundiyên Sinat, Êre, Heftanîn, Dêreşîşê, Mêrgeşîşê, Ava Gîzê, Bacwa û gundên Geliyê Pisaxa yên Birexrê, Marsîs, Kelok û 11 gundên din ber bi herêmê ve ketine rê, li gundê Şeranîşa Jor li xala kontrolê ya artêşa Tirkiyê rêgirî lê hatine kirin. Leşkeran rê li wan girtiye û gotiye ku herêm di bin kontrola wan de ye û mafê tu kesî nîne vegere.
Hêjayî gotinê ye ku ji sala 2020an ve artêşa Tirk bi kûrahiya 9 kîlometreyan devera Heftanînê û gundên derdorê xistiye bin kontrola xwe. Tevî ku bi destpêkirina proseya aştiyê re gundiyên hezar û 192 gundên Herêma Kurdistanê hêvî dikirin ku vegerin ser xaka xwe, lê heta niha ev rê li ber wan girtiye û wekî koçber jiyan dikin.
