Lijneya Rêveberiyên Herêmî ya DEM Partiyê têkildarî konferansên bajaran peyamek belav kir û destnîşan kir ku konferan dê di 25-26’ê Nîsanê de li Agirî, Mêrdîn û Rihayê pêk werin. Di peyama ku ji bo konferansan hat dayîn de, banga mezinkirina pêvajoyê û avakirina jiyana hevpar a gelan hate kirin.
Xebatên Lijneya Rêveberiyên Herêmî ya DEM Partiyê ku ji bo konferansên bajarî yên bi armanca xurtkirina xeta siyasî û civakî tên lidarxistin, bê navber dewam dikin. Lijneyê têkildarî konferansa li ser hesabên xwe yên dijîtal peyamek belav kir û daxuyand ku di çarçoveya xebatan de, wê di 25 û 26’ê Nîsanê de li sê bajarên girîng ên wekî Agirî, Mêrdîn û Rihayê konferans werin lidarxistin.
Li Agiriyê berxwedan, li Mêrdînê jiyana hevpar
Di peyamê de têkildarî armanc û naveroka konferansên ku wê di dawiya hefteyê de pêk werin de taybetmendî û ruhê her sê bajaran hate destnîşan kirin. Di peyamê de wiha wiha hate gotin: “Em ê li Agiriyê berxwedanê, li Mêrdînê jiyana hevpar a nasname û çandên cuda, li Rihayê jî germahiya rojê hîs bikin.”
Banga avakirina jiyana wekhev
Di berdewamiya peyamê de pêvajoya Aştî û Civaka Demokratîk hate bibîrxistin û hate destnîşankirin ku armanca bingehîn a van civîn û konferansan ew e ku gavên ji bo aştiyê hatine avêtin werin xurtkirin. Daxuyanî bi van gotinan bi dawî bû: “Em ê pêvajoya ku birêz Abdullah Ocalan daye destpêkirin mezin bikin û jiyana wekhev a gelan bi hev re ava bikin.”
