Şêniyên gundên Sehil El Xab a Hemayê ku piraniya wan Elewî ne ji ber êriş, talan û diziyên komên Şamê bêzar bûne û diyar dikin ku mal û canê gelê herêmê di xeteriyê de ye.
Komên girêdayî Hikûmeta Demkî ya Sûriyê bi awayek bêkontrol tevdigerin û jiyanê li welatiyan heram dikin. Şêniyên herêmê diyar dikin ku rêya di navbera gundên Sehil el Xab ên dikevin bakur û rojavayê Hemayê yên wekî Til el Teten, Til el Siyah, Til el Xar, Horat, Emûrîn û El Letme bûye wekî deriyên sînor ên nefermî yên di navbera dewletan de. Li gorî gotinên şêniyên herêmê ew rê êdî ne ewle ne û rojane dema karmend diçin ser karê xwe û cotkar diçin nava zeviyên xwe, têne talankirin û destdirêjiya devkî li wan tê kirin.
Malên welatiyan talan tên talankirin
Niştecihên herêmê ji vê rewşê gilî kirin û anîn ziman ku sewal, telefon, motorsîklêt, pere û eşyayên wan ên keseyî ji wan tên standin û dest datînin ser mal û milkên wan. Welatiyan anî ziman ku êdî mijar ji dizî û şelandinê jî derketiye û bi çekan qesta canê wan tê kirin. Hate zanîn ku berî niha çend rojan komên Şamê êrişî çewlikek çêlekan a şêniyekî herêmê kirine û gef li xwediyê çewlikê xwarine. Şêniyan anî ziman ku êdî cotkar newêrin biçin nava zeviyên xwe yên çandiniyê û her tim sewalên wan ji aliyê çekdaran ve têne dizîn.
Gilî dikin lê tiştek naguhere
Welatiyan anîn ziman ku piraya niştecihên herêmê Elewî ne û ji ber vê yekê jî çiqas giliya van komên çete dikin jî tiştek naguhere. Welatiyan anî ziman ku niha jiyana wan ji ber destdirêjiya çekdaran di xeterêyê de ye û nikarin li hemberî wan xwe biparêzin. Her wiha şênî dibêjin ew her tim li qereqola polîsan gazinca dizî û destdirêjiya van komên çekdar dikin, lê polîs tenê pere ji şêniyan digirin û nêzî van komên çete nabin.
Gerînendetiya Hêzên Ewlehiyê yên girêdayî hikumeta demkî ya Sûriyeyê yên li herêma Sehil El Xab ragihand ku wan ji bo ewlehiya herêmê û parastina mal û milkên gel bendên kontrolê danîne û bi şev dewriyeyan derdixin. Lê welatî vê wekî îdîayek ne rast dibînin diyar dikin ku herêma Sehil El Xab ji ber şer û felaketên xwezayî gihaştiye asta man û nemanê û tu ewlehiya mal û canê wan nemaye.
