Hevserokê Giştî yê DBPê Keskîn Bayindir li Rihayê bi ciwanan re civiya û diyar kir ku ev pêvajoyê dê bi hêz û qiweta ciwan bigihêje encamê û got: “Divê di serî de ji bo aştiyê em bi xwe bawer bin û benda kesî nemînin, xwe bi rêxistin bikin û ji nû ve avabikin.”
Hevserokê Giştî yê DBPê Keskîn Bayindir li Rihayê di çarçoveya bernameya “Em gotina aştiyê bi gel re saz dikin” li Parqa Necîp Fazil Kisakurek a Rihayê bi ciwanan re civiya. Tevî Keskîn Bayindir, parlamentera DEM Partiyê ya Rihayê Dîlan Kunt Ayan, rêveberên DBPê û gelek ciwan tev li civînê bûn.
Keskîn Bayindir diyar kir isogeriya pêvajoya Aştî û Civaka Demokratîk gel û bi taybet jî ciwan in û got: “Rêber Ocalan dibêje hewceye hûn tenê nebin temaşevan divê pozîsyoneke wiha nebe. Divê hemû kes xwe tevlî vê pêvajoyê bike û em xwe xurt bikin ku dewlet jî neçar bibîne gavan bavêje. Bi mîlyonan însan tenê cihê xwe de rûnê û wek temaşevan bimînê vê demê jî dewlet jî wisa bisekine. Serokatî dibêje li her derê meclîsên xwe ava bikin û pirsgirêkên xwe çareser bikin.”
‘Divê em li her derê û ewilî xwe bi rêxistin bikin’
Hevserok DBPê Keskîn Bayindir destnîşan kir ku gelek taxên Kurdistan û Tirkiyeyê bûne cihê tiryakê û wiha domand: “Belê raste vê pêvajoyê de şer sekîniye. Lê dewlet bi rêya tiryak û fûhûşê ve polîtîkayan dimeşîne. Her wekî din çetebûyîn pêş xistiye. Ev mesele dê çawa çareser bibin? Dewlet û naxweşxane vê meseleyê çareser nake. Hewceye em hemû bibin yek û xwe bi rêxistin bikin, bi rêya meclîsan, komîsyonan ve van pirsgirêkan çareser bikin. Ji ber vê ji bo em xwe bi rêxistin bikin Rêberê me her tim bang dike û dibêje ne hewceye hûn gazî dewletê bikin hûn dikarin xwe bi xwe çareser bikin. Divê em li her derê û ewilî xwe bi rêxistin bikin. Meseleya qanûnî ihtimal heye çareser bibe. Lê meseleyên civakî divê em benda kesî nemînin û bi xwe çareser bikin. Dewlet jî dixwaze bi rêya tiryak û fûhûşê civakê parçe bike. Hewceye em bi xwe nû ve rêxistin bikin. Ev hêz û qiweta me dê me bibe encamê. Serokatî her tim bang dike û dibêje pişta min rêxistinbûn û çalakbûne ve dê xurt bibe. Ji ber vê yekê jî rêxistinbûna me dê pişta Serokatî xurt bike.”
‘Hemû kes jî hêz û qiweta me dizane’
Keskîn Bayindir bi lêv kir dewlet bi hêz û rêxistinkirina tevgera Kurd niha li ser maseyê rûdinê û ev tişt anî ziman: “Ev qabîliyeta me heye ku em bi ser bikevin. Hemû kes jî hêz û qiweta me dizane. Divê em bi xwe bawer bin. Me hêj jî çîroka xwe nenivîsandiye. Em ê ji vir şûn ve çîroka xwe binivîsîn. Bi hêz û qiweta xwe ya ku ji têkoşîna 46 sal an digirin û bi bawerî bimeşînin.”
Bayindir li ser pirsa “gelo pirsgirêka 40 sal in nehatiye çareserkirin dê niha çawa çareser bibe?” ev tişt anî ziman: “Di dîrokê de her tim ev pirsgirêk Kurd bi şer û pevçûnan ve hat destgirtin. Em niha dixwazin vê zemînê biguherînin û li ser vê zemînê têkoşînekî bidin. Em vê zemînê jî zemîna hiqûqî ye. Ji ber vê yekê jî divê di serî de ji bo aştiyeke birûmet em xwe bawer bibin û bi hev re avabikin.”
‘Divê em dengê aştiyê bilind bikin’
Keskîn Bayindir, pirsa “Serokatî re danûstendin heye û dewlet bi awayekî tasfiyekirinê nêz dibe û niyeta dewletê çi ye?” wiha bersivand: “Qismekî dewletê dibêje hewceye em vê pêvajoyê pêş bixin. Qismekî dewletê jî derveyî norm hene û dixwazin serî şer bidin û dixwazin tekoşîna Kurd tasfiye bikin. Em nikarin bêjin dewlet bi temamî şer dixwaze û temamî aştiyê dixwaze. Serokatî niha li hemberî vê yekê têdikoşe û dixwaze aqlê aştiyê pêş bixe. Serokatî dibêje hewceye em di civakê de rê nedin kesên ku dixwazin pêvajo xerab bibe. Divê em dengê kesên aştiyê dixwazin bilind bikin û rêxistin bikin. Ji ber vê yekê jî pêşketina pêvajoyê birêxistinbûyîna gelê Kurd û gelên Tirkiyeye ve derbas dibe.”
