Hevserokê Giştî yê DBPê Keskîn Bayindir li navçeya Hewagê ya Rihayê bi karkerên tekstîlê, çandiniyê û gel re hevdîtin pêk anîn. Di rûniştinan de li ser newekheviya herêmî, qanûnên çarçoveyê û pêvajoya aştiyê nîqaş hatin kirin. Keskîn Bayindir diyar kir ku ji bo aştiyê divê rêxistinbûn bê xurtkirin.
Partiya Herêmên Demokratîk (DBP) di çarçoveya civînên gel de yên ku bi dirûşma “Em aştiyê bi gelan re ava dikin” li dar dixe, li navçeya Hewagê ya Rihayê bi welatiyan re hat cem hev. Di şandeya DBPê de Hevserokê Giştî yê DBPê Keskin Bayindir û rêveberên partiyê cih girtin.
‘Ji bo pêvajoyê piştgiriyeke xurt hewce ye’
Keskîn Bayindir destpêkê li navenda navçeya Hewagê bi karkerên tekstîlê re hevdîtin pêk anî. Keskin Bayindir li vir axivî û bal kişand ser bandora şer a li ser aboriyê û wiha got: “Di nava 50 salên şer û pevçûnan de aboriya welat zirarên mezin dît. Heya niha 2 trîlyon dolar ji bo vî şerî hatiye xerckirin. Ji ber ku hemû pereyên welat ji şer re tên veqetandin, îro ji her sê ciwanan yek jê bêkar e. Li Rihayê ev rewş girantir e, ji du ciwanan yek bêkar e. Tabloya ku em jê re dibêjin newekheviya navbera herêman, bi temamî ev e.” Bayindir da zanîn ku bi Pêvajoya Aştî û Civaka Demokratîk re astengiyên aborî dê bên derbaskirin û asta refahê bilind bibe, ji bo vê jî bang li her kesî kir ku piştgiriyeke xurt bidin pêvajoyê.
‘Av li ber destê me ye lê em nikarin erdê xwe av bidin’
Karkerên tekstîlê yên ku eleqeyeke mezin nîşanî şandeyê dan, diyar kirin ku ji ber nebûna derfetên kar, mirov neçar dimînin ku koçî bajarên din bikin. Karkerekî bal kişand ser newekheviya herêmî û got: “Li vir sed donim erdê mirovan heye lê nikarin biçînin. Çar aliyên me bi avê dorpêçkirî ne, lê em nikarin xaka xwe av bidin. Ji vir bi tûnelan avê dibin Herrana ku 75 kîlometre dûr e. Li wir ji bo donimekî 500 TL tê girtin, lê av li ber destê me ye û ji bo donimekî 4 hezar û 500 TL ji me dixwazin.”
Karkerekî din jî daxwaz kir ku li navçeyê fabrîke bên avakirin da ku rê li ber koçberiya ciwanan bê girtin.
Keskîn Bayindir û şandeya pê re piştî tekstîlê, derbasî bajaroka Yaylaxê bû. Li vir pêşî bi karkerên çandiniyê re ku piraniya wan karkerên ji Kobanê bûn, hevdîtin hat kirin û li ser şert û mercên xebatê axivîn. Karkerên çandiniyê anîn ziman ku ew li bendê ne pêvajoya aştiyê di demeke nêz de bigihêje encamê.
‘Divê em ji bo aştiyê têbikşin’
Bayindir piştî serdana karkeran, derbasî civîna gel a li bajaroka Yaylaxê bû. Bi sedan welatî tevli civînê bûn û eleqeyeke germ nîşan dan. Di civînê de posterğ Rêberê Gelê Kurd Abdullah Ocalan hat vekirin û gelek caran dirûşma “Bijî Serok Apo” hat berzkirin. Keskin Bayindir li vir behsa “Qanûnên Çarçoveyê” yên di çarçoveya pêvajoyê de tên bendewarkirin kir û wiha axivî: “Desthilatdariyê dixwest derxistina qanûnan paş bixe. Lê belê di mıtîngên me yên li Amed, Wan, Mêrsîn û Stenbolê de ku bi sed hezaran kes tevlî bûn, gelê me daxwaza xwe bi zelalî nîşan da. Dewletê jî ev dît û niha dibêje ku dê di meha tîrmehê de van qanûnan derxîne. Ji ber vê yekê divê em rêxistinbûna xwe hîn bihêztir bikin. Aştî tenê bi xwestinê nayê, divê em ji bo wê têbikoşin.”
Piştî axaftina Keskîn Bayindir, welatiyan mafê axaftinê girt û bêbaweriya xwe ya li hemberî dewletê anîn ziman. Welatiyan diyar kir ku gava dewlet di derxistina qanûnan de gavan giran diaveje, ev yek baweriya wan kêm dike û wiha gotin: “Em li ser rêya Rêber Apo dimeşin. Muxatabê vê pêvajoyê ew e. Qanûnên ku bên derxistin divê bi wî re bên axaftin. Heta ku ev neyê kirin, aştî nayê vê derê.”
Civîna gel bi dirûşmeya “Bijî Serok Apo” bi dawî bû.
