Danişîna ewil a doza Hakan Tosûn ê ku bi lêdanê hatibû kuştin hate dîtin. Berî danişînê meş hate lidarxistin. Di çalakiyê de pirsa “Kê kujerê Hakan Tosûn diparêze?” hate kirin. Şandeya dadgehê doz taloqî 8ê tîrmehê kir.
Rojnameger û ekolojîst Hakan Tosûn roja 10ê cotmeha 2025an de li navçeya Esenyûrtê ya Stenbolê di êrişekê de ji serê xwe darbe xwar û rakirin nexweşxaneyê. Tevî tedawiyan jî Hakan Tosûn di 14ê cotmehê de jiyana xwe ji dest dabû. Danişîna ewil a dozê li Edliyeya Bakirkoyê ya Stenbolê hate dîtin. Malbata Tosûn, Hevserokê DEM Partiyê ya Stenbolê Çinar Altan, Serokê Giştî ya TÎPê Erkan Baş, Sendîkaya Rojnamegeran a Tirkiyeyê (TGS) û gelek rojnameger tev li dozê bûn. Beriya ku danişîn dest pê bike, girse lî rawestegeha Încîrliyê kom bûn û heta edliyeyê meşiyan. Di meşê de pankarta “Ji bo Hakan Tosûn edalet” hate vekirin. Girse piştî hate pêşiya edliyeyê daxuyanî da. Daxuyanî ji hêla berpirsiyara weşanê ya giştî ya Kovara Onsozê Songul Yucel ve hate xwendin.
‘Kê kujerê Hakan Tosûn diparêze?’
Songul Yucel diyar kir ku divê îro ne tenê kujer hatibûyan darizandin û got: “Piştî bûyerê demildest lêpirsînek baş nehat meşandin. Malbat û hogirên Hakan ji bo rastiyê derxin holê têdikoşin. Parastina kujeran diyar dike ku li pişt bûyerê hin kes tên parastin. Kê kujerê Hakan Tosûn diparêze? Di dîmenên bûyerê de jî diyar e ku kesê 3yemîn heye. Lê belê ew kes nayê darizandin. Biryara ku dê derxê holê ku an kujer were parastin an jî dad bê bicihanîn. Hakan parêzvanê xweza û gelan bû, ji bona wê jî hate armackirin. Hakan li her derê li dijî talanê bû. Em ê jî li pişt doza Hakan bisekinin.”
‘Em ê herdem li pey rastiyê bin’
Hevserokê DEM Partiyê yê Stenbolê Çinar Altan jî anî ziman ku li pêşiya wan mînaka Gulistan Dokû heye û got: “Çawa ku bi têkoşînê di doza Gulistan Dokû de pêşketin çêbû di doza Hakan Tosûn de jî dê heman tişt pêk bê. Em ê herdem li pey rastiyê bin.”
Paşê girse ji bo şopandina dozê xwest derbasî edliyê bibe. Polîsan ketina gel û parêzeran asteng kir. Tenê nêzî 30 kes ketin salonê.
Şandeya dadgehê doz taloqî 8ê tîrmehê kir.
