Wan – Jinên Wanî yên serdana bîranîna şehîdên Tevgera Azadiya Kurdistanê kirin, bal kişandin ser têkoşîna şehîdan û dan zanîn ku şehîd ji bo maf û azadiya gelê xwe çûne serê çiyayan, ne ji bo berjewandiya xwe.
Li Taxa Karşiyaka ya navçeya Rêya Armûşê ya Wanê ji bo endamên Tevgera Azadiya Kurdistanê ku di cih û dîrokên cuda de jiyana xwe ji dest dane, bîranîn hatin lidarxistin. Bi hezaran welatî tev li bîranînan bûn û piştgirî û dilsoziya xwe ji bo şehîd û malbatan nîşan dan.
Jinên ku ji bo mîkrofona me axivîn, dan zanîn ku ew dê têkoşîna şehîdan bilindtir û mezintir bikin. Jinan anî ziman ku ew bi xêra şehîdan niha li vir in û wiha gotin: “Ji kêfa xwe neçûne serê çiyanan, ew maf û azadiya gelê xwe dixwazin. Banga me xwedîderketina şehîdan e, bila herkes xwedî li şehîdan derbikeve.”
Jinan bal kişand ser pêvajoya ‘Aştî û Civaka Demokratîk’ a bi banga Rêberê Gelê Kurd Abullah Ocalan dest pê kiriye û dan zanîn ku daxwaza wan di serî de Abdullah Ocalan, azadiya hemû Kurdan û gelên bindest e.
Jinan diyar kirin ku ew dixwazin di çarçoveya vê pêvajoyê de mafên Kurdan bên dayîn û ew bi rehetî di her qadê de bi çand û zimanê xwe bijîn.
Her wiha jinan banga aştiyê li rayedarên dewletê kirin û xwestin êdî aştî pêk were û destnîşan kirin ku ew naxwazin dayik bigirîn û xwîn birije, divê êdî dewlet jî gavên pêwîst biavêje û girtî bên berdan.
