Wan – Dayikên ku li Wanê tev li şîna şehîdên Tevgera Azadiyê Kurdistanê yên di dem û dîrokên cuda de jiyana xwe ji dest dane bûn, diyar kirin ku ew bi şehîdên xwe serbilind in û xwestin êdî xwîn neyê rijandin.
Bi pêşengiya Komeleya Yekîtî Çand Piştevanî û Alîkariyê ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER) ya Wanê, ji bo şehîdên Tevgera Azadiyê Kurdistanê yên di dem û dîrokên cuda de jiyana xwe ji dest dane, li navçeya Artemêtanê ya Wanê, şîn hate danîn. Li qada bîranînê wêneyê şehîdên ku di dem û cihên cuda de jiyana xwe ji dest dane, li ser maseyan hatine danîn. Malbatên şehîdan li ber wêneyên zarokên xwe, bi ser bilindî amade ne û sersaxiyan qebûl dikin. Bi hezaran kes serdana konê şîna cangoriyan dikin û tev li êş û serbilindiya malbatan dibin.
‘Bila êdî xwîn neyê rijandin’
Dayikên ku tev li şîna şehîdan bûne, xwemginiyên xwe anîn ziman û êşa malbatan parve kirin. Dayikan anî ziman ku ew dê heta dawiyê li pey doza şehîdan bin û ew bi şehîdên xwe serbilind in.
Dayikan bal kişand ser pêvajoya “Aştî û Civaka Demokratîk” jî û diyar kirin ku ev du sal in şer nîne û xwîn nayê rijandin û dayikan xwest ev rewşa aştiyê bidome û pêvajo pêş bikeve.
Her wiha dayikan banga xwedîderketina şehîdan jî li gelê Kurd kirin.
