Mêrdîn – Kesên ku tev li bîranîna şehîdên Tevgera Azadiya Kurdistanê bûnhest û daxwazên xwe yên ji bo şehîdan anîn ziman. Dayik û welatiyên Nisêbînê diyarkirin ku heta îro bi saya Tevgera Azadiyê, xwîna şehîdan û felsefeya Rêberê Gelê Kurd Abdullah Ocalan hebûna gelê Kurd hatiye parastin û bang li gelê Kurd kirin ku xwedî li nirxên şehîdan derkevin û yekitiya xwe ava bikin.
Tevgera Azadiyê ya Kurdistanê şehîdên ku di dîrok û cihên cuda de jiyana xwe ji dest dane eşkere kir. Gelek deverên Bakurê Kurdistanê bîranîna şehîdan bi pêşengiya Komeleya Yekîtî Çand Piştevanî û Alîkariyê ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER) tên lidarxistin. Li navçeya Nisêbînê ya Mêrdînê jî ji bo Şehîdên Azadiyê ya Kurdistanê bernameya bîranînê tê lidarxistin. Bîranîna ku bi beşdariya hezaran welatiyan, Meclisa Dayikên Aşitiyê, parlamenter û rêveberên DEM Partî, DBP û MEBYA-DERê didome, rastî xwedîderketineke xurt a gel tê. Di qada bîranînê de pankartên bi nivîsên têkildarî têkoşîna azadiyê û rûmeta şehîdan hatin daliqandin û girseyê bi berzkirina dirûşmeyan dilsoziya xwe ya bi têkoşîna wan re nîşan dan. Di bîranîna şehîdên Nisêbînê de peyamên ji bo yekîtiya neteweyî, azadî û aşitiyeke birûmet derketin pêş.
Di roja duyemîn a bîranîna şehîdan de kesên ku tev li bîranînê bûn hest û daxwazên xwe yên ji bo şehîdan ji ajansa me re parve kirin.
‘Divê gelê Kurd li her çar parçeyan bibe yek’
Dayika Rahşan Demîrel, Emîne Demîrel bal kişand ser berdêlên dîrokî û wiha got: “Ji bo azadiya Kurdistanê me canê xwe da. Şehîdên me em ji tunebûnê anîn hebûnê. Felsefeya Serok Ocalan mîna behreke bêdawî ye. Em wekî dayik êdî naxwazin xwîn birije, dayikên tu gelan bigirîn. Em daxwaza aşitî, rûmet û serxwebûnê dikin. Divê gelê Kurd li her çar parçeyan bibe yek.”
‘Divê em xwedî li ziman û axa xwe derkevin’
Zuhriye Kayik a ku kurê wê beriya salên 90î tev li têkoşîna azadiyê bûye, destnîşan kir ku gelê Kurd bi saya vê têkoşînê nasnameya xwe parastiye û ev tişt anî ziman: “Berê me newêrîbû em bibêjin Kurd in. Zarokên me ditirsiyan. Bi saya xwîna şehîdên azadiyê em fêr bûn, em şiyar bûn û me xwe nas kir. Îro serbilind im ku ez dibînim gelê me gihiştiye vê astê.”
‘Xiyaneta li ziman û axê tê kirin, nayê qebûlkirin’
Emre Bîlen jî teqez kir ku ev pêvajo derfeteke dîrokî ye û ev nirxandin kir: “Pêwîst e dewlet jî, gel jî bi zanebûn nêzîkî vê pevajoyê bibin. Bi hezaran ciwanên me jiyana xwe ji bo vî zimanî û vê axê feda kirin. Şehîdên têkoşîna azadiyê ne tenê yên malbatan e, şehîdên tevahiya gelê kurd ê 60-80 milyonî ne. Xiyaneta li ziman û axê tê kirin, nayê qebûlkirin.”
Banga xwedîderketina şehîdan
Ferhan Dilbirîn û Yûsra Bûdak jî anîn ziman ku bingeha vê têkoşînê berxwedana gel e û banga xwedîderketina li pêvajoya aşitî, demokrasî û nirxên azadiyê kirin.
