Şaredariya Sûrê bi daxuyaniyekî bal kişand ser parvekirinên medyaya dîjîtal û diyar kir ku firoşkarên seyar ji ber ku dibin sedema astengiya peyarêyan ew neçar mane ku mudaxaleyî wan bikin.
Li navçeya Sûrê ya Amedê demek dirêj e ji ber tezgehên firoşkaran welatî di çûn û hatina peyarêyan de astengiyan dijîn. Her çiqas ji aliyê şaredariyê ve ji bo çareserkirina pirsgirêkê gelek hevdîtin hatibin kirin jî ev pirsgirêk berdewam dike. Zabitayên şaredariyê ji bo çareserkirina pirsgirêkê dest bi kontrolên rojane kiriye û di hin hesabên medya dîjîtal de parvekirinên şaş û berevajî tên kirin. Li ser van parvekirinên şaş û berevajî Şaredariya Sûrê daxuyaniyek nivîskî belav kir.
Daxuyaniya ku ji aliyê Şaredariya Sûrê ve hatiye parvekirin wiha ye:
“Li ser Cadeya Gaziyê, ji ber astengkirina peyarêyan ku rê li ber çûn û hatina peyayan digire, zabitayên şaredariyê dest bi kontrolan kirin. Ji ber ku li ser medyaya dijîtal hin parvekirinên şaş û berevajîkirî belav bûne, me pêwîstî dît ku em raya giştî agahdar bikin.
Weke Şaredariya Sûrê, me ji bo çareserkirina vê pirsgirêkê gelek civîn li dar xistin. Me nêzîkatiyeke avaker û lihevker nîşan da û komîsyonek ava kir da ku bi hevkarî çareseriyekê bibînin. Me bi aliyên têkildar re hevdîtinên pêwîst kirin, agahî û hişyariyên pêwîst dan wan û ji bo rakirina tezgehan heta 25ê cotmeha 2026an dem da wan.
Tevî hemû hewldanên ji bo diyalog û lihevkirinê, astengkirina peyarêyan berdewam kir. Ji ber vê yekê, ekîbên zabiteyên Şaredariya Sûrê û Şaredariya Bajarê Mezin a Amedê neçar man ku destwerdanê bikin.
Em wan îdiayên şaş ên li ser medyaya dîjîtal red dikin ku vê destwerdanê berevajî dikin. Di wan parvekirinan de, ew hevdîtinên berfireh û pêvajoyên lihevkirinê yên ku berê hatibûn kirin, bi temamî hatine paşguhkirin. Ev destwerdan bi armanca parastina mafê welatiyên me bi taybetî jî kesên astengdadar ji bo çûnûhatineke ewle û hêsan hatiye kirin.
Em hem mafê esnafên xwe yê debarkirinê, hem jî mafê welatiyên xwe yê bikaranîna azad a qadên giştî li ber çavan digirin. Lê belê, tu çalakiyeke bazirganî nikare bibe hincet ji bo binpêkirina mafên kesên din.
Şaredariya Sûrê, tevî ku pabendbûna xwe ya bi diyalog û lihevkirinê diparêze, dê parastina nîzama bajêr, qadên giştî û mafên welatiyên xwe bidomîne.”
