Wan – Hevşaredarê Tuşbayê Umît Keser derbarê plana îmarê û veguherîna bajêr ên li taxên Kalecîk û Şemsîbeyê yên navçeya Tuşbayê de axivî û wiha got: “Plana heyî dê bibe sedema xirakirina gelek xanîyan. Em li dijî veguherîna bajêr nîn in, lê veguherîn bi zilmê nabe.”
Bi polîtîka û rêya qeyim, piştî desteserkirina Şaredariya Bajarê Mezin a Wanê, li taxên Kalecîk û Şemsîbeyê yên ser bi navçeya Tuşbayê ya Wanê ve plana îmarê ket meriyetê û wê di encama vê planê de gelek şêniyên taxan mexdûr bibin. Biryar, ji aliyê Serokkomariyê ve di 24ê Nîsana 2026an de hat weşandin û ket meriyetê. Erka birêvebirina pêvajoyên plana îmarê û rewşa milkên xezîneyê jî bi piranî di bin berpirsiyariya Şaredariya Bajarê Mezin a Wanê de ye.
Hevşaredarê Tuşbayê Umît Keser ku her du tax jî di nav sînorên navçeya wan de ne, behsa plana ku wan amade kiribû kir û vê projeya îmarê weke zilmê pênase kir.
‘Qeyim plana me xira kir’
Hevşaredar Umît Keser bi bîr xist ku wan di nav heft mehên ewil ên hevşaredariya xwe de bi plansaziyên şaredariya xwe û yên Şaredariya Bajarê Mezin a Wanê re xebateke berfireh kirin e û got: “Li herêmê daxwaz û nerazîbûnên mezin ên gel hebûn. Me ev daxwaz yek bi yek berhev kirin, planeke nû li gorî dilê gel amade kir û di her du meclisên şaredariyan de jî erê kir. Lê piştî derbeya qeyim, bi hinceta sedemên teknîkî ev plana me ji panoyê derxistin. Li wir pirsgirêkeke teknîkî tune bû, sedema sereke ew bû ku ew plan ji bo berjewendiya gel bû.”
‘Ev ne plan e, zilm e’
Umît Keser bal kişand ser cudahiya di navbera şaredariya gel û zîhniyeta qeyim de û wiha pê de çû: “Piştî daxistina plana me, bi lez planeke nû derxistin holê. Gelê me yê taxên Şemsîbey û Kalecîkê li dijî vê yekê rabû ser pêyan û hatin meclisa me. Xelkê her du taxan nerazîbûnên xwe anîn ziman. Gel dibêje ku ew vê planê qebûl nakin. Di plana me de li tevahiya taxan tenê xirakirina xaniyekî dihate pêşdîtin, lê di plana qeyim de tenê li ser parselekê biryara xirakirina 25 xaniyan hatiye dayîn. Ev ne plan e, ev zilm e. Ev berxwedan û daxwaza gel bi rêya parlamenterên me gihîşt rojeva Meclisê jî.”
‘Xaniyên gel ne kevn in’
Umît Keser da zanîn ku di bin navê veguherîna bajêr de nêzîkatiyeke ku rastiyê berovajî dike tê birêvebirin û wiha got: “Ev xaniyên navborî ne xaniyên kevn in, ên 12-13 salî ne. Piştî erdheja Wanê ya 2011an di sala 2013an de li gorî plana Wezareta Hawirdor û Bajarvaniyê wekî avahiyên nû û saxlem hatine çêkirin. Ji mixtar û welatiyan re dibêjin ku ew ê tenê rêyên mezin ên 30-40 metreyî vekin, paşê çi dibe ne diyar e. Ji ber vê nezelaliyê, xebata me ya 10-15 hezar ton asfaltê ya ku me îsal ji bo Şemsîbey û Kalecikê plan kiribû jî di nîvî de ma.”
‘Em ê ti carî rê nedin desteserkirina mal û milkê gelê xwe’
Umît Keser di dawiya axaftina xwe de destnîşan kir ku ew li dijî polîtîkayên desteserkirinê ne, li cem gelê xwe ne û got: “Em li dijî veguherîna bajaran nîn in, lê veguherîn bi zilmê nabe. Banga me ew e ku demildest vegerin ser plana ku me bi gel re amade kiribû. Heke plana me esas bê girtin, ji sedî 50 zêdetir lêçûn jî dê kêm bin. Em wek Şaredariya Tuşbayê amade ne piştgiriyê bidin her çareseriyeke ku xaniyên xelkê hilnaweşîne û daxwazên wan esas digire. Em ê ti carî rê nedin ku mal û milkê gel werin desteserkirin.”
