Saziyên Jinan ên Wanê têkildarî 25ê Mijdarê Roja Têkoşîna Li Dijî Tundiya Li Ser Jinan di çarçoveya kampanyaya “Em ji bo bijîn û bidin jiyandin birêxistin dibin” de meşek li dar xistin û gotin: “Jin wê vê pergala mêr-dewlet biguherînin.”
Saziyên Jinan ên Wanê têkildarî 25ê Mijdarê Roja Têkoşîna Li Dijî Tundiya Li Ser Jinan di çarçoveya kampanyaya “Em ji bo bijîn û bidin jiyandin birêxistin dibin” de meşek li dar xistin û kampanya bi dawî kirin. Jin, ji pêşiya Wan AVMê heta Qada Bajêr meşiyan û pankarta “Em ji bo bijîn û bidin jiyandin birêxistin dibin” vekirin û dowîzên “ez jin im jiyan im”, “di xeta azadiya jinê de heta serkeftinê têkoşîn”, “xweparastin hebûn e”, “li ser şopa Sarayan ber bi şoreşa jinê” û hwd. hatin hilgirtin. Gelek jin tev li çalakiyê bûn.
Kampanyaya xwe bi dawî kirin
Piştî meşê jinan li ser Rêya Cûmhûriyetê daxuyaniyek da û metna daxuyaniyê ji hêla rêvebera KURDÎGEHê Evîndar Akbûlût ve hat xwendin. Evîndar Akbûlût anî ziman ku ew kampanyaya xwe ya “em ji bo bijîn û bidin jiyandin birêxistin dibin” bi dawî dikin. Evîndar Akbûlût destnîşan kir ku ew xwişkên Mirabal, yên ku ji aliyê dîktatoriya Trujîllo ve hatin kuştin û bûne semboleke gerdûnî ya têkoşîna ji bo azadiya jinan, bi bîr tînin û got: “Îro em dengê Rojin Kabaiş, Nagihan Akarsel, Cihan Bilgin, Îpek Er, Şûle Çet, Hevrîn Xelef û hemû jinên ku bedenê xwe bi axê re kirine yek û bûne bêdawî nin. Dengê me dengê wan e û têkoşîna me berdewamiya jiyana wan e.”
‘Li cîhanê heta meha mijdarê 86 hezar jin hatine kuştin’
Evîndar Akbûlût diyar kir ku mirinên bi guman ên jinên afirînerên jiyanê tu carî tesaduf nînin. Evîndar Akbûlût da zanîn ku serhildana wan ya li dijî mirinên bi guman ên jinan û komkujiyên li ser jinan her roj xurttir dibin û got: “Ev komkujiyên li ser jinan encama newekheviya zayendî, bêcezayî û polîtîkayên şerê taybet û her wiha sîstema olî, mîlîtarîst û serweriya mêran e. Wekî encama van polîtîkayan, em serhildana xwe ya kûr a li dijî zêdebûna kuştinên jinan, li Bakûrê Kurdistanê, li her devera ku em lê amade ne, vediguherînin berxwedanê. Ji aliyê zîhniyeta mêrê desthilatdar ve heta mijdara 2025an li cîhanê 86 hezar jin hatine qetilkirin. Di cîhaneke ku her roj, 140 jin têne qetilkirin, tundî bûye sîstem, laşê jinê dixwazin bikin amûra îstîsmarê.”
‘Ji bo pêşîlêgirtina tundiyê her sazî bila erka xwe bi cîh bîne’
Evîndar Akbûlût bi lêv kir ku bi parastina jiyana hev, bi mezinkirina hevgirtinê, bi bûyîna hêza li hemberî tundîyê, jin wê vê pergalê biguherînin. Evîndar Akbûlût binê wê xêz kir ku ew dixwazin bijîn û wiha dawî li axaftina xwe anî: Em tu carî bêdeng namînin, tu carî paşdegav ne avêjin. Ev têkoşîn ne tekoşîna îro ye, ya bi salan e . Em bangewaziya xwe dubare dikin. Ji bo pêşîgirtina tundiya li ser jinê em daxwaz dikin ku hemû sazî erkên xwe bi cih bînin, polîtîkaya bêcezabûnê bi dawî bibe, sûcdarên şidetê neyên parastin, hemû sepanên zagon û îdarî yên ku qadên Azadiyê yên jinê teng dikin bên rakirin. Ji bo Rojînê û ji bo her jina ku hatiye qetilkirin û windakirin, ji bo jiyanên nîvcomayî, ji bo jîn û jiyînê em têkoşîna xwe bi rêxistin dikin.”
Meş û daxuyanî, piştî çalakiya rûniştinê ya 5 deqeyan bi dawî bû.
