Saziyên Ziman ên Şirnexê bi boneya 15ê Gulanê Cejna Zimanê Kurdî daxuyanî da û banga statuya zimanê Kurdî kir.
Li navçeya Cizîrê ya Şirnexê bi boneya 15ê Gulanê Cejna Zimanê Kurdî meş hat lidarxistin. Li gel endam û rêveberên partiyên siyasî, hevşaredarên Cizîrê, endam û rêveberên saziyên ziman gelek welatiyên li ber avahiya Saziya Ziman, Çand û Hunerê ya Birca Belek kom bûyîn heya Rezê Mîra meşiyan. Di meşê de pankarta, ‘Statuya Kurdî, perwerdehiya bi Kurdî’ hat hilgirtin.
Piştî ku girse gihîşt Rezê Mîra, Rêveberê Saziya Birca Belek Cahît Akil daxuyanî xwend û got ku di sedsala 21emîn de, hê jî li ser me Kurdan, bi taybetî li ser milyonan zarokên Kurd polîtîkayên bişaftinê bi awayekî hovane tên meşandin.
Banga Ocalan xebatên li ser ziman anî merheleyek nû
Cahît Akil bal şikand ser gotinên Rêberê Gelê Kurd Abdullah Ocalan ên derbarê zimanê Kurdî de û axaftina xwe wiha berdewam kir: “Neteweya Kurd herî dawî, bi banga Rêber Abdullah Ocalan a ‘Aştî û Civaka Demokratîk’ wekî hemû nîqaşên li ser civakê yên din, nîqaşên pêşîlêvekirina astengiyên li pêşiya azadî, statu û perwerdehiya bi zimanê Kurdî, têkoşîn û xebatên ji bo Kurdî yên civakî gihandin merheleyeke nû. Asta hewldan û xwedîlêderketina li Kurdî xurt kir. Divê em bi taybetî destnîşan bikin ku banga Rêber Abdullah Ocalan di heman demê de bûye sedema zindîkirina giyanê neteweyî û civakeke azadîxwaz, aştîparêz û demokratîk. Biserxistina têkoşîna vê pêvajoyê dê rê li ber mîsogerkirina nasname, xwebûn, statu, mafê siyasî û hiqûqî veke. Ji bo pêkhatina van jî em ê di asta herî bilind de xwedî li banga ‘Aştî û Civaka Demokratîk’ derkevin, têkoşîna xwe ya ji bo pêşvebirin û xurtkirina zimanê Kurdî ji her demê zêdetir berfireh bikin.”
‘Têkoşîna me ya ji bo statuya Kurd dê berdewam bike’
Cahît Akil herî dawî diyar kir ku heya statuya zimanê Kurdî were naskirin têkoşîna wan dê berdewam bike û wiha dawî da axaftina xwe: “Em wek neteweya Kurd, dê tu car jiyaneke bêyî ziman, çand û nasname, ku hêmanên statuya siyasî ya gelê Kurd in qebûl nekin. Ji bo ku ev daxwazên me Kurdan pêk bên em Kurd dê ji her demê zêdetir têkoşîna xwe ya mafdar û rewa bi biryar bidomînin.”
Daxuyanî bi çepik û tilîliyan bi dawî bû.
