Platforma Çalakiyên Hevbeş a Tevger û Rêxistinên Jinan li Rojava, ji bo piştgiriya YPJê kampanyayek da destpêkirin. Jinan daxwaz kir ku YPJ bi parastina xweseriya xwe, di nava Wezareta Parastinê ya Sûriyeyê de wekî hêzeke fermî bê naskirin.
Platforma Çalakiyên Hevbeş a Tevger û Rêxistinên Jinan li Rojava, bi daxuyaniyeke girseyî kampanyaya piştgiriya Yekîneyên Parastina Jin (YPJ) îlan kir. Daxuyanî li Stadyuma Şehîdên 12ê Adarê ya bajarê Qamişloyê, bi beşdariya nûnerên partiyên siyasî, hiqûqnas, rewşenbîr û bi dehan jinan hat dayîn. Daxuyaniyê bi Kurdî ji aliyê Berdevka Kongra Star Rîhan Temo, bi Erebî ji aliyê Cîgira Seroka Desteya Jinan a Cizîrê Wesayîf Dendea û bi Suryanî jî ji aliyê endama Yekitiya Jinên Suryan Semîra Gewriyê ve hat xwendin. Di çalakiyê de pankartên “Em hemû YPJ ne” û “YPJ nûnertiya me dike” hatin hildan.
‘YPJ sembola parastina rûmeta mirovahiyê ye’
Di daxuyaniyê de hat destnîşankirin ku parastina cewherî mafekî rewa û gerdûnî ye. Hat bibîrxistin ku di salên borî de YPJê di şerê li dijî DAIŞê û rêxistinên terorîst de li refên pêş cih girtiye û bi hezaran jin û zarok rizgar kirine. Jinan diyar kir ku rola YPJê ne tenê leşkerî ye, di heman demê de hêzeke exlaqî û civakî ye ku li dijî zîhniyeta tarî nirxên wekhevî û edaletê diparêze.
Di daxuyaniyê de daxwazên bingehîn ên kampanyayê jî aşkera kirin. Platformê daxwazên xwe yên ji bo pêşeroja YPJê û ewlehiya jinan di 6 xalên sereke de wiha rêz kirin:
Naskirina Fermî: YPJ wekî hêzeke leşkerî bi rêkûpêk di nava Wezareta Parastinê ya Sûriyeyê de bê naskirin.
Parastina Xweseriyê: Pêkhateya YPJê wekî beşeke yekgirtî û xweser di nava pergala parastinê ya Sûriyeyê de bê parastin.
Mîsogerkirina Destkeftiyan: Destkeftiyên jinan ên li Rojava ku ji cîhanê re bûne mînak, werin parastin û xurtkirin.
Azadî û Edalet: Girtiyên jin serbest werin berdan, cenazeyên şehîdan werin radestkirin û aqûbeta jinên winda bê eşkerekirin.
Banga li Koalîsyonê: Bang li Koalîsyona Navneteweyî tê kirin ku piştgiriyê bide naskirina statûya YPJê ya di nava wezaretê de.
Mafê Makezagonî: Li gorî makezagona ku xizmeta leşkerî tenê bi mêran re sînordar nake, divê rola jinan a di nava artêş û saziyên ewlehiyê de bê mîsogerkirin.
Di dawiya daxuyaniyê de bang li hemû tevgerên jinan, hêzên demokratîk, raya giştî ya cîhanê û medyaya navneteweyî hat kirin ku piştgiriyê bidin vê kampanyayê û li kêleka têkoşîna azadiyê ya YPJê cih bigirin. Hat diyarkirin ku beşdarbûna YPJê di nava artêşê de, wê bibe gaveke dîrokî ji bo avakirina saziyeke parastinê ya ku cihêrengiya civaka Sûriyeyê nîşan dide.
