TJAyê û EGE-TUHAYDERê bi boneya 8ê Adarê li Îzmîrê ji bo jinên girtî fular û kartên pîrozbahiyê şandin.
Bi banga Tevgera Jinên Azad (TJA) û Komeleya Piştevaniya bi Malbatên Girtî re ya Herêma Egeyê (EGE TUHAY-DER) bi boneya Roja Jinên Kedkar a Cîhanî qertên pîrozbahiyê û fular şandin. Di çalakiyê de pankarta “Ji bo azadiya jinên girtî, em jiyanê dihonin” hat vekirin û dirûşmên wekî “Jin, Jiyan, Azadî”, “Bijî berxwedana zindanan” û “Bijî piştevaniya jinan” li kolanên Îzmîrê deng veda. Parlementera DEM Partiyê ya Îzmîrê Burcugul Çubuk û gelek dayikên aştiyê jî tevlî çalakiyê bûn. Hevseroka EGE-TUHAYDERê Ayfer Yildirim daxuyanî xwend.
‘Ruhê 8ê Adarê di berxwedana jinên Kurd de şîn dibê’
Ayfer Yildirimê bal kişand ser vîn û berxwedana jinên kurd û diyar kir ku jinên kurd bi salan e li dijî hişmendiya baviksalar, polîtîkayên înkar û îmhayê li ber xwe didin û got: “Jinên kurd ne tenê wekhevî xwestin; wan nîşan da ku jiyaneke azad jî pêkan e. Modela jiyanê ya bi pêşengiya jinan li Rojava hat ava kirin, îsbat kir ku jin ne tenê mexdûr in, lê afirînerên jiyanê ne. Îro hevalên me yên li girtîgehan jî berdewamiya vê kevneşopiya berxwedanê ne.”
Ayfer Yildirim her wiha bal kişand ser binpêkirinên mafan ên li girtîgehan ên wekî cezayên dîsîplînê yên kêfî, astengkirina mafê tenduristiyê û tecrîdê û destnîşan kir ku heta azadiya jinan neyê mîsogerkirin, aştiyeke rasteqîn pêknayê.
‘Bila girtiyên siyasî bên berdan’
Dayika Aşitiyê Sultan Yagmekan jî di çalakiyê de axivî û got: “Em dixwazin hemû hevalên me yên jin di nav me de bin. Salek e behsa pêvajoya aştiyê dikin, lê ka edalet? Kesên ku jinan dikujin û şîdetê dikin tên berdan, lê girtiyên me yên siyasî hîn di hundir de ne. Em bang li Wezareta Dadê dikin; girtiyên me serbest berdin.”
Li dijî tundiya li girtîgehan banga têkoşînê
Di dawiyê de parlamenter Burcugul Çubuk axivî. Burcuguç Çubuk bal kişand ser îşkenceya ku li girtîgehan li jinan tê kirin û got ku jinan bi kelepçeyî muayene dikin û leşkeran dixin odeyên bijîşkan. Çubuk ev rewş wekî ‘sûcekî zayendî’ pênase kir û got: “Ew dixwazin bi girtinê pêşiya me bigirin, lê em ê li her derê li dijî tecrîd û zextan dengê xwe bilind bikin. Ev kartên ku em dişînin, ji bo şikandina dîwarên li dora vîna jinan e.”
Çalakî bi şandina qert û fularan bi dawî bû.
