Hêzên Ked û Demokrasiyê yên Îzmîrê di salvegera 13an a Berxwedana Geziyê de daxuyaniyek da û hat destnîşankirin ku Gezi mîraseke bihêz e ku ronahiyê dide têkoşîna ked û demokrasiyê.
Hêzên Ked û Demokrasiyê yên Îzmîrê, boneya salvegera 13an a Berxwedana Geziyê li pêşiya Navenda Çandê ya Turkan Saylanê daxuyaniyeke dan. Di daxuyaniyê de hat destnîşankirin ku Gezi tevgereke gel a dîrokî ye ku bi mîlyonan mirov li dora daxwazên wekhevî, azadî, demokrasî û edaletê gihandine hev. Di çalakiyê de pankarta “Gezi di 13 saliya xwe de ye, tarîtî diçe Gezî dimîne” hat vekirin û dirûşmeyên “Ji Geziyê heta Kobanê şoreşger li vir in” û “Hesabê Geziyê dê bê pirsîn” hatin berzkirin. Daxuyaniya çapemeniyê li ser navê girseyê ji hêla Berdevkê KESKê ya Îzmîrê Savaş Candemir ve hat xwendin.
‘Gezi mîraseke bihêz e ku ronahiyê dide têkoşîna ked û demokrasiyê’
Savaş Candemir diyar kir ku Geziyê bi mîlyonan mirov bi daxwaza wekhevî, azadî, edalet, aştî, demokrasî û laîktiyê li qadan gihandine hev û got: “Gezi; wekî yek ji tevgerên gel ên herî girseyî, herî berbelav û herî birûmet ên dîroka Tirkiyeyê, zindîtiya xwe ya di bîra me de û hêviya xwe ya ji bo têkoşîna civakî diparêze. Em ciwanên xwe yên ku di Geziyê de jiyana xwe ji dest dane, di sala 13an de careke din bi rêzdarî bi bîr tînin; em careke din radigihînin ku em ê dest ji dûvçûna kujerên wan û vîna siyasî ya li pişt van qetlîaman bernedin. Berxwedana Geziyê; zemîneke mezin a piştgirî û berxwedanê ye ku bi sekna mil bi mil a jin, ciwan, karker, kedkarên giştî, xwendekar, hunermend, parêzvanên ekolojiyê û fecesên gel ên ji nasname û baweriyên cuda hatiye avakirin. Gezi ne tenê tevgereke gel a ku di rabirdûyê de maye ye; îro jî mîraseke bihêz e ku ronahiyê dide mûxalefeta civakî û têkoşîna ked û demokrasiyê.”
‘Ev hîn destpêk e, têkoşîn dê bidome!’
Savaş Candemir anî ziman ku Gezi hêvî, berxwedan û vîna azadî, wekhevî û edaletê ya gelan e û wiha pê de çû: “Kes, sazî, sendîka, rêxistinên girseyî yên demokratîk û partiyên siyasî yên ku li pêşberî desthilatdariyê çok danaynin, tên hedefgirtin; mûxalefeta civakî tê xwestin ku bi polîtîkayên zext, ceza, qamçiyê darazê û çavtirsandinê bê teslîmgirtin. Lê belê, heta ku serî de karker û kedkarên giştî, hemû beşên civakê yên tên mêtin, çewisandin, marjînalîzekirin û yên ku bi neheqî di zindanan de tên girtin, di wê rêya ku Geziyê vekiriye de bimeşin, li ku derê têkoşîn hebe dê şopeke Geziyê teqez li wir hebe. Berxwedana Geziyê di rabirdûyê de dîwarên tirsê yên hatibûn hûnandin hilweşandiye; bi gotina ‘Ev hîn destpêk e, têkoşîn dê bidome!’ rêya ku divê em tê de bimeşin nîşanî me daye. Li dijî hemû sepanên der-hiqûqî, binpêkirinên mafan, keyfîtiya siyasî ya ku destûra bingehîn jî nas nake û polîtîkayên çavtirsandinê, yekane rêya derketinê; têkoşîna rêxistinkirî, biryardar û girseyî ya kedkaran e.”
Daxuyaniya çapemeniyê bi dirûşmeyên “Slav ji her kesê ku li Geziyê ketî û şer kirî re” bi dawî bû.
