Endama Rêveberiya Amedsporê Laleş Ertugrul ku endama CHPê bû ragihand ku ew helwesta CHPê ya neçûna Îmraliyê şermezar dike û got ku Abdullah Ocalan aktorê sereke ye.
Parlamenterên CHPê civîna Komîsyona Demokrasî, Xwişk-Biratî û Hevgirtina Milî ya ji bo çûyîna Girava Îmraliyê terikandibûn û dengdayînê red kiribûn. Bi vê helwesta CHPê re nerazîbûn û hêrsa li dijî CHPê berdewam dike. Endama Rêveberiya Amedsporê Laleş Ertugrul ku endama CHPê bû ji partiya xwe îstîfa kir û nerazîbûn nîşan da. Laleş Ertugrul di Hilbijartina Giştî ya 14ê Gulana 2023yan de namzeta CHPê ya Amedê bû.
Ertugrul li ser hesabê xwe yê Xê daxuyanî da û ragihand ku wê ji CHPê îstîfa kiriye.
‘Birêz Ocalan aktorê sereke ye’
Laleş Ertugrul di parvekirina xwe de diyar kir ku daxuyaniya CHPê ya ku çûyîna Îmraliyê red kir ji bo wê tenê ne helwestek polîtîk a aktuel nîn e û got: “Ev yek ji bo min şikestinek dîrokî ye. Ev yek li dijî bîr, dîrok û nasnameya min e. Pirsgirêka Kurd yek ji meseleyên bingehîn a Tirkiyeyê ye û reva ji çareserkirina pirsgirêkê carek din nîşanî min da. Ez vê helwesta CHPê ya ku ji çareserkirina meseleyê direve di aliyê min de nayê qebûlkirin.
Di çarserkirina pirsgirêka Kurd de aktor û muxatabê sereke birêz Ocalan e. Lewma divê ji bo çareserkirina pirsgirêka Kurd pê re hevdîtin û muzakere bê kirin. Ez biryara CHPê ya neçûna Îmraliyê şermezar dikim û ji CHPê îstîfa dikim.”
