Ji bo Emîne Ocak ku yek ji sembolên Dayikên Şemiyê bû, li Qada Galatasarayê merasîm hate lidarxistin. Kesên di merasîmê de axivîn diyar kirin ku dê têkoşîna Dayika Emîne li erdê nemîne û kujerên windakiriyan bên darizandin.
Dayika Şemiyê Emîne Ocak, ku di 20’ê Hezîranê de ji ber krîza dil a ji ber têkçûna nefesê li beşa lênêrîna giran dihat dermankirin, di 22yê Tîrmehê de jiyana xwe ji dest da. Merasîma cenazeyê Emîne Ocak li Qada Galatasarayê, cihê berxwedana mirovên Şemiyê, hate lidarxistin.
Hevseroka Komeleya Mafên Mirovan (ÎHD) a Giştî Eren Keskîn, endama Şandeya DEM Partiyê ya Îmraliyê Pervîn Buldan, Berdevka Partiya Wekhevî û Demokrasiyê ya Gelan (DEM Partî) Ayşegul Dogan, parlamenterên DEM Partiyê, parlamenterê CHPê yê Amedê Sezgîn Tanrikûlû, dayika Berkîn Elvan, Gulsum Elvan, mirovên Şemiyê, rêxistinên civaka sivîl, parêzvanên mafên mirovan, Dayikên Aştiyê, partiyên siyasî û bi hezaran kes tev li merasîma cenazeyî bûn.
Girseyê darbesta Emîne Ocak a bi qumaşê reş pêçayî anî Qada Galatasarayê. Wêneya Emîne Ocak û pankarta bi nivîsa “Te dest jê berneda, em jî dê dest jê bernedin” li ser maseya ku darbesta wê lê hatibû danîn hatin daliqandin û qurnefîl li ser darbesta wê hatin danîn.
‘Em ê ji bo hemû dayik, bav û xizmên xwe yên windakirî li ber xwe bidin’
Merasîma cenaze bi xwendina çîroka jiyana Emîne Ocak dest pê kir û axaftin hatin kirin. Keça Emîne Ocak Masîre Ocak axivî û got: “Dayika min a ku ji êşê sebir, ji sebirê jî hêvî afirand. Dayika min tu bû hêvî di dilê bi milyonan mirovî de. Tu her tim bi serbilindî sekinî. Ne tenê êşa te, êşa her kesî di dilê te de bû. Me di çavên te de êşa yên windakirî hîs kir. Em ê wan ji bîr nekin. Em niha te ber bi Hasan ve bi rê dikin. Hişê gelekî bi dilê dayikekê lê dide. Em ê ji bo hemû dayik, bav û xizmên xwe yên windakirî li ber xwe bidin.”
‘Em ê têkoşîna te li erdê nehêlin’
Hevjîna Fehmî Tosûn ê bi kiryar nediyar hate windakirin Hanim Tosûn jî wiha got: “Em sozê didin te Dayika Emîne, em ê têkoşîna te li erdê nehêlin. Oxir be ji te re. Li wê derê dayik hene ku li benda te ne. Dayika Elmas, Dayika Berfo, Hasan li wir e. Dema ku te Hasan hembêz kir, em ê jî kêfxweş bibin.”
‘Kujer wê bêne darizandin’
Endama Şandeya Îmraliyê Pervîn Bûldan jî wiha axivî: “Ev qad qada dayika Emîneyê ye. Ev qad qada berxwedanê ye ku beriya 30 salan dest pê kir. Te li pişt xwe bi milyonan mirov hiştin. Silavan li Hasan, Savaş, Abdullah bike. Kujer wê bêne darizandin, hesab bidin. Oxir be ji te re Dayika Emîne.”
‘Te em hînî gelek tiştan kir’
Hevseroka ÎHDê ya Giştî Eren Keskîn jî got, “Dayika Emîne yek ji wan kesan bû ku çalakiya bê îteatiya sivîl dan destpêkirin. Têkoşîna dayikên Şemiyê ewqasî xurt bû ku îro neçar man vê qadê vekin. Te em hînî gelek tiştan kir, xweş razê.”
Merasîm bi dirûşma “Dayê em li vê derê ne” bi dawî bû. Cenazeyê Emîne Ocak wê saet di 16:00 de bibin Cemxaneya Gazî. Piştre jî li Goristana Gazî li kêleka gora kurê wê Hasan Ocak bê veşartin.
