Berdestî sibehê Artêşa Îsraîlê paytexa Îranê Tahranê da ber mûşekan. Tê gotin gelek rayedarên Îranê bûne hedefa êrişan.
Artêşa Îsraîlê li dijî Îranê dest bi êrişan kir. Li navenda Tahrana paytexta Îranê gelek cih bûn armancan muşekên Îsraîlê. Li gorî agahiyan di nava cihên hatine armanckirin de, malên gelek rayedarên payebilind ên Îranê jî hene.
Li gorî agahiyên ku di medya Îsraîlê de derketine, di encama êrişên Îsraîlê de gelek fermandarên leşkerî yên Îranê hatine armanckirin.
Netanyahu: Armanc tunekirina navendên nukleer e
Serokwezîrê Îsraîlê Benjamin Netanyahu ragihand ku wan bi operasyoneke bi navê “Şêrê ku bilind dibe” êrişî navendên bernameya dewlemendkirina nukleer a Îranê kiriye.
Netanyahu da zanîn ku armanca wan tesîsa sereke ya dewlemendkirinê ya li Natanzê ye û got: “Heta ku metirsî were rakirin êriş dê berdewam bikin.”
Ji aliyeki din ve Wezîrê Parastinê yê Îsraîlê, Îsrael Katz jî ragihand ku êrişî Îranê kirin e.
Hêzên Parastinê yên Îsraîlê (IDF) jî ragihand ku wan dest bi “êrişeke pêşwext, birêkûpêk û hevaheng” li dijî bernameya nukleerî ya Îranê kiriye.
Hat diyarkirin ku bi dehan balafirên şer beşdarî operasyonê bûn e.
Li gorî agahiyan beriya êrişê, li Herêma Kurdistan û Iraqê dengê muşek û balafiran ji aliyê welatiyan ve hatiye bihîstin.
Hêjayî gotinê ye beriya niha Îsraîlê gefa êrişan li ser Îranê xwaribû, serokê Amerîkayê Donald Trump jî ragihandibû ku dibe Îsraîl êrişî Îranê bike. Li Iraqê jî Amerîkayê hişyariya êrişan dabû û ji bo vê jî dîplomatên xwe ji konsolosxaneya Bexdayê vekişandibû.
