HSDê bi daxuyaniyekê ragihand ku dewleta Tirk li Kobanê komkujiyek din pêk aniye û di komkujiyê 9 ferdên malbatekê hatine kuştin. HSDê got: “Dewleta tirk a ku nikare li dijî hêzên me li pêş bikeve, sivîlan dikuje.”
Êrişên dewleta Tirk û komên wê yên paramîlîter SMOyê yên li ser Bakur û Rojhilatê Sûriyeyê berdewam dikin. Navenda Ragihandinê ya Hêzên Sûriyeya Demokratîk (HSD) têkildarî şer û pevçûnên di nava 24 saetên dawî de qewimîn daxuyanî da.
‘Li Berxbotanê komkujî hat kirin’
Daxuyaniya HSDê bi vî rengî ye:
“Dewleta Tirk a dagirker û çeteyên wê ku nikarin li eniyên şer li hemberî hêzên me pêşketinan pêk bînin, her timî ji bo rakirina tola binkeftina xwe ya li meydanî, êrişî gund û bajaran û sivîlan dike. Di vê çarçoveyê de dewleta Tirk a dagirker duh bi şev herêma navbera gundên Qumç û Berxbotanê yên başûrê Kobanê de bombebaran kir û komkujiyeke mezin li dijî malbatekê pêk anî. Di encama vê komkujiyê de di nav de 7 zarok û bi tevî dayik û bavê xwe ve 9 kes ji heman malbatê şehîd bûn û 2 kes jî birîndar bûn.”
Bendava Tişrînê
Balafirên şer ên dewleta Tirk a dagirker êrişên xwe yên giran li derdora bendavê û gundewrê wê dewam kirin. Li dijî cihên karkeran ên girêdayî bendavê jî êriş pêk anîn. Şeva Şemiyê/Yekşemê heya saetên derengiya rojê tevahiya gundewarê bendavê bi obusan topbaran kirin. Di encamê de zerarên mezin li gund û malên sivîlan bûn.
Balafirên şer ên dewleta Tirk a dagirker gundên Xeseq û girê Sêvê yên derdora bendavê bombebaran kirin. Gundê Bîr Hiso û girê Sêvê jî bi balafirên bê mirov ên bi çek hatin hedefkirin. Her wiha derdora pirê û gundewarê wê, gundên Tîna, Cada, Bîro Hiso, Xeseq, Dîkan, Melha, Sinaa û xaçerêya Sirînê bi zêdetirî 80 guleyên obus, tank, roket û hewanan hatin topbarankirin. Ji ber êrişên hewayî û bejahî zerarên mezin gihîştin mal û milkên şêniyan.”
