HSD’ê bi daxuyaniyekê ragihand ku dewleta tirk û komên paramîlîter ên girêdayî wê agirbest bin pê kirine û êrişî başûrê Kobanê dikin.
Navenda Ragihandinê ya Hêzên Sûriyeya Demokratîk (HSD) daxuyaniyek weşand û ragihand ku dewleta Tirk û komên wê yên paramîlîter agirbest bin pê kirine û ji duh êvarê ve bi piştgiriya hewayî ya balafirên bêmirov êrişî bendava Tişrînê û pira Qereqozaqê ya li başûrê Kobanê dikin.
Daxuyaniya HSDê wiha ye:
“Tevî hewldanên aramkirinê yên Dewletên Yekbûyî yên Amerîkayê, êrişên dagirkeriya Tirk û çeteyên wê duh û îro jî li ser gelek herêmên derdora Kobanê, Bendava Tişrînê û Eyn Îsayê berdewam kirin.
Duh êvarê saet di 18.00an de çeteyên artêşa Tirk a dagirker bi piştgiriya hewayî ya balafirên keşfê ji 3 baskan ve êrişî herêma Bendava Tişrînê kirin. Şervanên Meclisa Leşkerî ya Minbicê bersiv dan. Di pevçûnan de kuştî û birîndarên wan çêbûn û neçar bûn ku ji herêmê birevin.
Li herêma Pira Qereqozaqê û gundê Bîr Heso yê dikeve başûrê bajarê Kobanê, balafirên bêmirov ên artêşa Tirk saet di 23.00an de bi 3 êrişên hewayî herêm bombebaran kir, her wiha artêşa Tirk a dagirker bi dehan moşek û top li herêmê barandin.
Li Eyn Îsayê, duh êvarê, balafirên keşfê yên dewleta Tirk a dagirker li gundê Hoşanê li erebeyekê xist, her wiha gundên rojhilatê Eyn Îsayê û rojavayê Girê Spî jî bi dehan topên hewanan bombebaran kirin.
Îro danê sibê komên çete bi piştgiriya hewayî û bejayî ya artêşa Tirk a dagirker, ji gelek baskan ve êrişeke berfireh li ser herêma Bendava Tişrînê pêk anî. Di van kêliyan de şerên dijwar di navbera hêzên Meclisa Leşkerî ya Minbicê û çeteyan de diqewimin. Li herêmê balafirên keşfê yên dagirkeran digerin.
Li hemberî vê yekê û ji ber ku artêşa Tirk a dagirker û çeteyên wê agirbest bin pê kir, her wiha ji ber bombarana dijwar a balafirên keşfê yên bêmirov û topbaranê, duh danê êvarê hêzên me li derdora pira Qereqozaqê balafireke keşfê ya Bayraktar TB2 a Tirk xist xwarê. Her wiha hêzên me ji bo bersivdayîna êrişan li hemû herêmên Bakur û Rojhilatê Sûriyeyê û bi taybet li Kobanê ketine rewşa berevaniyê.
Dewleta Tirk a dagirker û çeteyên wê agirbestê bi kar tînin û hewl didin êriş û planên xwe yên dagirkeriyê bidomînin û dixwazin raya giştî bi kar bînin. Ev yek ji raya giştî re pir xuya ye. Êdî pir diyar e ku bi hemû hovîtiya xwe dixwaze herêmê dagir bike û gelê wê koçber bike.”
