Hizbullaha Libnanê bi balafirên bêmirov li bakurê Îsraîlê xist. Di encama êrişê de li bajarokê Şlomiyê xeteke firînê û baregeheke nû ya leşkerî hedef hatin girtin.
Şer û aloziya li ser xeta sînorê di navbera Libnan û Îsraîlê de dewam dike. Hizbullaha Libnanê careke din bi balafirên bêmirov li armancên leşkerî yên artêşa Îsraîlê xist. Li gorî dîmen û agahiyên dawî yên ji herêmê, hate dîtin ku balafireke bêmirov ji sînorê Libnanê derbasî bakurê Îsraîlê dibe. Ev tevgera hewayî li nêzî sînor ketiye ber kamerayan û di dîmenan de tê dîtin ku ji herêmê dûman bilind dibe.
Baregeha nû û xeta firînê bûn hedef
Hate ragihandin ku 2 dronên girêdayî Hizbullahê gihîştine hedefên xwe. Di çalakiyê de, li bajarokê Şlomî yê li bakurê Îsraîlê xeteke firînê (pîst) û baregeheke leşkerî ya ku nû ji aliyê artêşa Îsraîlê ve hatibû avakirin, bi awayekî rasterast hedef hatin girtin.
Piştî lêdanê ji cihê bûyerê dûkel bilind bû. Heta niha der barê bîlançoya zirarên madî an jî windahiyên artêşa Îsraîlê de daxuyaniyeke fermî nehatiye dayîn.
