Riha- DEM Partiyê Hevşaredarê Hewagê Îsmaîl Yildiz ji wezîfeyê girt. Hat ragihandin ku Yildiz dê ji niha û pê ve wekî endamê meclîsa şaredariyê xebatên xwe berdewam bike.
DEM Partiyê Hevşaredarê Hewagê ya Rihayê Îsmaîl Yildiz ji wezîfeyê girt. Di daxuyaniya ku ji aliyê Rêveberiyê xwecihî ya DEM Partiyê ve hatî dayîn de hat destnîşankirin hevşaredarê Hewagê Îsmaîl Yildiz ji wezîfeyê hatiye girtin û ragihandin ku Yildiz dê ji niha û pê ve wekî endamê meclîsa şaredariyê xebatên xwe berdewam bike.
Daxuyaniya rêveberiyên xwecihî bi vî rengî ye:
“Di hilbijartinên 31ê Adara 2024an de yek ji serkeftinên girîng ên ku partiya me bi dest xistine, li Rihayê pêk hatiye. Partiya me, li vir şaredariyên 7 navçeyan qezenc kiriye di serî de şaredariya bajarê mezin, li gelek navçeyan jî piştgirî û teqdîra xurt a gel girtiye. Li hemberî vê hezkirin û girêdanbûna ku gelê Rihayê nîşanî partiya me daye, di serî de amûrên şerê taybet, her cure rê û rêbaz hatine xebitandin; şaredariyên me heta îro bi awayekî sîstematîk hatine hedefgirtin û xwestine wan bêpêjin.
Şaredariyên me yên civakparêz ên demokratîk, tevî van hemû êrîşan jî bi têgihîştina xizmetkirina gel tevdigerin. Hevalên me yên hilbijartî jî ji bo pêkanîna vê têgihîştina xizmetê, berpirsyariyeke pêşeng digirin ser xwe. Her hevalek me yê hilbijartî, di heyama wezîfeya xwe de wekî ku ji nirxandina gelê me û partiya me re vekirî ye, bi heman awayî di bin kontrola saziyê de ye jî.
Şaredariya me ya Hewagê di vê çarçoveyê de hatiye nirxandin. Erka pêşengiyê ya ku hevşaredarê me yê Şaredariyê Îsmaîl Yildiz ji hilbijartinan vir ve girtiye ser xwe, li gorî giliyên ku gihîştine destê partiya me û lijneyên me yên têkildar, ji nû ve hatiye destgirtin. Di vê pêvajoyê de hem bi hevşaredarê me Îsmail Yildiz re hem jî bi hemû muhatabên têkildar re hevdîtinên pêwîst hatin kirin.
Li gorî Belgeya Helwestê ya ku di konferansa me ya vê dawiyê de hatibû qebûlkirin, Rêgeza Banga Vegerê hat xebitandin û pêvajoya nirxandinê ya ku hat meşandin li ser bingeha vê rêgezê bi encam bû. Di encama hevdîtin û nirxandinên dualî de, hevalê me Îsmail Yildiz ji wezîfeya hevşaredariyê hat girtin. Ew ê ji niha û pê ve wekî Endamê Meclîsa Şaredariya Hewagê beşdarî xebatên partiya me û şaredariya me bibe.”
