Enqere – Serokvekila Koma Meclîse ya DEM Partî Gulîstan Kiliç Koçyigit xwest komîsyon bi werekî tev bigere û got: “Divê komîsyon bi lêz biçe Îmraliyê û nêrîn û pêşniyarên Rêberê Gelê Kurd Abdullah Ocalan guhdar bike.”
Serokvekîla Koma Meclîsê ya Partiya Wekhevî û Demokrasiyê ya Gelan (DEM Partî) Gulîstan Kiliç Koçyigit tekildarî geşedanên rojevê li meclise daxuyanî da. Gulîstan Kiliç Koçyigit bilêv kir ku neçareserbûna pirsgirêka Kurd bi rêyên demokratik bandor li ser qirîza aborî û civakî dike û got: “Pereyên dewletê ji bo ÎHA/SÎHA dihat xerç kirin. Pereyên ji bo tendûristî û perwerdehiyê jî li şer hat xerçkirin. Divê lêçûna niha ne ji bo şer ji bo aştiyê be. Îro ji vir em dibêjin ku em ê destpêkek nû bikin û hêvî dikin ku budçeya dema nû ne budçeya şer, budçeya aştiyê be. Divê komîsyon hem ji bo pêvajoyeke siyasî, hem jî ji bo aborî û civakî xebatê bike. Divê li hemû kesan guhdarî bike, nêrîn û ramanên her kesî bigire. Ev yek rê li ber aştiya mayînde û gavên nû yên wêrek vedike.”
Dê li hemû beşên civakê guhdar bikin
Gulîstan Kiliç Koçyigit anî ziman ku wekî DEM Partiyê li pêşniyarên hemû beşên civakê guhdar bikin û got: “Em ê bi ode, rêxistinên pîşeyî, sendîkayan, rêxistinên jinan, ekolojîst, bawerî û hemû beşên civakê, guhdar bikin.
‘Divê komîsyon bi lêz biçe Îmraliyê’
Di berdewama axaftina xwe de Gulîstan Kiliç Koçyîgit destnîşan kir ku divê komîsyon bi lêzgînî bi Rêberê Gelê Kurd Abdullah Ocalan re hevdîtin bike û got: “Divê komîsyon ji bo çareseriya pirsgirêkê gavên cidî û wêrek bavêje. Ev ne tenê daxwazek e, hewcedariyeke vê pêvajoyê ye. Ev yek daxwaza aştiyê ya gelan e û hewcedariyeke vê pêvajoyê ye. Ger em dixwazin pirsgirêkeke dîrokî ya Kurdan çareser bikin, divê em sînoran derbas bikin û gavên wêrek bavêjin. Ev diyalog ne tenê ji bo gelê Kurd, ji bo paşeroja hemû welatiyên Tirkiyeyê, aştiya civakî, pêşveçûna pêvajoya aştiyê û civaka demokratîk gelek girîng e. Divê komîsyon bi wêrekî tev bigere. Serokê Giştî yê MHPê birêz Bahçeli di 22ê Cotmeha 2024an de li meclîsê banga dîrokî kiribû. Gotibû ‘bila were li meclîsê biaxive’ çawa bi wate bû, bi heman awayî di vê pêvajoyê de jî, divê komîsyona biçe Îmraliyê, bi birêz Ocalan re biaxive. Divê bi lez heyeteke komîsyonê biçe Îmraliyê û ev pêvajo bê plankirin.”
Êrişên li ser CHPê
Gulîstan Kiliç Koçyigit bal kişand ser êrişên li dijî CHPê û wiha pê dê çû: “Êrîşên li ser CHPê ne tenê li ser CHPê ne. Ev demokrasiya Tirkiyeyê dike armanc. Qeyum darbe ye, gasp e. Îradeya gel tê dizîn. Em li dijî vê sîyaseta qeyûm ne razî ne, îro û sibê jî em ê li dijî vê yekê têbikoşin.
‘Ji bo aştiyê divê qirkirina xwezayê bi dawî bibe’
Gulîstan Kiliçkoçyigit anî ziman ku di pêvajoya aştiyê de jî polîtikayên li dijî xwezayê berdewam dike û wiha dirêjî da axaftina xwe: “Li Kurdistanê polîtîkayên şer xweza, daristan û jiyanê wêran dike. Barajên ewlekariyê ekosîstemê xera dikin, li Şirnex û Bestayê daristan bi awayekî sîstematîk tên qirkirin. Li dijî van qirkirinan îtirazên gel û doza rawestandina wêraniyê bi hinceta ewlekariyê nayên qebûlkirin. Gelê Botanê li Bestayê bi meşeke ekolojîk li dijî vê yekê derket. Dayîkan li wir da hawaran û got, ‘Pêşî bi Bestayê, bi darên me re aştiyê bikin’ Ji bo çareseriya pirsgirêka Kurdan, divê ev qirkirin jî bi dawî bibe.”
