Amed – Nivîskar û lêkolînerê Kurd Faîk Bulut diyar kir ku Amerîka û Îsraîl di şerê li dijî Îranê de qonax bi qonax pê ve diçe û got heke ku qonax neçin serî dê gelên Îranê li ber rejîmê rabin û vê carê dê rejîm hilweşe. Faîk Bulut got ku rewşa Kurdan jî li Rojhilata Navîn baş e û divê Kurd bi serwextî tevbigerin.
Îsraîlê di 13ê Hezîranê de li dijî Îranê dest bi êrişan kir. Îranê jî bi fuzeyan bersiv da Îsraîlê. Şerê navbera her du welatan di roja dehemîn de berdewam dike. Heta niha di êrişên Îsraîlê yên li ser Îranê de gelek payebilind, fermandar û pisporên atomê hatine kuştin. Her wiha li her du welatan jî gelek sivîl hatine kuştin. Dengvedana vî şerê germ li Rojhilata Navîn û cîhanê berdewam dike.
Nivîskar û dîroknasê Kurd Faîk Bulut ku bi pisporiya xwe ya Rojhilata Navîn tê nasîn, têkildarî şerê di navbera Îsraîlê û Îranê de û bandora vî şerî ya li ser Kurdan ji Ajansa Welat re axivî.
‘Ne diyar e wê ev şer çiqas bidome’
Faîk Bulut diyar kir ku li gorî plana Amerîka û Îsraîlê ev şer dê 40 rojan bidome û got: “Lê belkî 50 roj bibe belkî du meh jî bidome. Lê ne diyar e, li gorî ka Îran çiqas dikare li ber xwe bide. Belkî di navbera 20 rojan de jî ev şer biqede. Em nizanin wê çawa bibe. Berxwedan û lêdana kê zêde be û kî bi hêz be wê ew bi ser bikeve. Lê li gorî plana Trump û Netenyahû çar qonax hene.”
‘Heke li hev nekin dê bi hêzek mezin lêxin’
Faîk Bulut qonax bi qonax plana ku Amerîka û Îsraîl dixwazin vegot û van qonaxan wiha anî ziman: “Ev qonax qonaxa yekem e; wek ku tê zanîn Îran û Amerîka hatin ser masê û hevdîtin kirin. Lê li hev nekirin. Trump got lêxin. Qonaxa duyemîn; dê carek din bên ser maseyê rûnên, lihevkirin lihevkirin lê heke lihevnekirin carek din Îsraîl û Amerîka dê lêxin. Qonaxa sêyemîn; di vê qonaxê de armanca wan ew e ku Xumeynî û pasdarên Îranê bila şûn ve herin, ew reformîst jî bi pêş de werin. Yanî ev çi ye? Bila ev reformîst bi Îsraîl û Amerîkayê re li hev bikin, peymanekê-mutabaqatekê çêkin. Heke ev jî nebû yanî ev proje jî nebe, dibe ku Xumeynî bi êrişekê bibin. Gelek payebilindên Îranê kuştin, ev li ber çavan e. Dixwazin bi kuştina van peybilindên leşkerî û pisporên atomî tasfiyeya rejîmê bikin. Dixwazin giştikan felc bikin. Vê yekê di Beyrûdê de jî kirin. Hîzbullah çawa çû, Hamas çawa çû, ev jî wisa ye.
Qonaxa çaremîn
Îcar qonaxa çarem çi ye? Em bêjin ku ev plan jî nebûn, yanî reformînîst derneketin û li hev jî nekirin. Dîsa gotin şer û şer. Di vê qonaxê de dê lêxin, yanî vê carê dê bi hêzeke mezin ve lêxin. Dê aloziyek mezin derxin. Di nav vê aloziyê de jî dê bangî gelên Îranê bikin; çi Kurd in, çi Fars in, çi Azerî ne, çi Belûc in û Ereb jî hene. Wê bangî van gikin; dê bêjin ji dema berxwedana ‘Jin jiyan azadî’ ve navbera hikûmeta Îranê û gel ne baş e. Di vê aloziyê de milet dê rabe ser xwe û bi tevîhev dê rejîmê hilweşînin. Qonaxa pêncemîn jî qiyametek sor e, ez jî wê nizanim.”
‘Derfetek mezin di destê Kurdan de ye’
Faîk Bulut bal kişand ser bandora vî şerî ya li ser Kurdan û aktorbûna Kurdan û wiha axivî: “Ev şer û alozî ji bo Kurdan stratejiyek, firsetek mezin e, derfetek mezin e. Ev derfet ji bo Kurdan girîng e. Ji sed salî carek derfet ketiye destê Kurdan. Çi Başûr e, çi Bakur e, çi Rojava ye û çi Rojhilat e. Niha sekinîne lê mêze dikin. Haşa hizûrê, dixwazin ‘Kuçik bibezin hevûdin’. Piştî ku kûçik beziyan hevûdin, vê carê şixûla şivana tê. Şivan kî ne? Şivan Kurd in. Wê Kurd di nava vê derfetê de bi hêzek mezin derkevin holê. Ji vir şûn ve Kurd aktor in, Kurd ne piyon in. Lê belê bi serhişî û biserwextî, bi planî tevbigerin. Heke pirsa xwe bikin yek, planek baş deynin holê û heke tifaqekî bi hêzên mezin re çêkin û Tirkiyeyê jî bi ser aştiyê ve mecbûrî bikin, vê carê roj roja Kurdan e.”
‘Rewşa Kurdan baş e’
Faîk Bulut destnîşan kir ku ew niha li Rojhilata Navîn rewşa Kurdan baş dibîne û got: “Lê şertekî heye, divê Kurd bi aqilane, bi serwextî û bi planî rabin. Belê niha talûke heye lê heke em şixûlekî nekin, wê talûke hebe. Em şixûlekî bikin em ê bi ser bikevin.”
‘Ji bo Tirkiyeyê xelat jî heye talûke jî heye’
Faîk Bulut bal kişand ser pêvajoya li Tirkiyeyê dest pê kiriye û wiha axivî: “Ev pêvajo dê bandorekî zêde li ser aktorbûna Kurdan bike. Niha li Tirkiyeyê mucazat heye, mukafat heye. Xelat heye, îkramiye heye. Xelat jî heye lê wele neke talûke jî heye. Û heke Tirkiye aştiye bike jî ji bo wê xelat heye. Lê ev xelat wê bi Kurdan re parî hev bikin. Şert jî ew e yanî vê xelatê bi Kurdan re parî hev nakin, ew jî qiyamet e.”
‘Îsraîl nikare êrişî Tirkiyeyê nake’
Faîk Bulut di dawiya axaftina xwe de îxtîmalê nade ku Îsraîl êrişê Tirkiyeyê bike û wiha got: “Îsraîl nikare êrişî Tirkiyeyê bike. Çimkî Amerîka viya naxwaze. Tirkiye jî nikare êrişî Îsraîlê bike. Çimkî Amerîka dixwaze Tirkiyeyê deyne milekî xwe û Îsraîlê jî deyne milê xwe dinê ku plana Rojhilata Navîn temam bike. Yanî nexşeya Rojhilata Navîn nayê guherandin lê belê dê planek deynin holê û şiklekî bidine Rojhilata Navîn. Bê Amerîka nabe. Di serî de Amerîka, Fransiz, Îngilîz hene û Îsraîl û Tirkiye heye. Daxwaziya wan jî ew e ku Tirkiye bi Kurdan re li hev bike. Yanî dewleta Tirk bi Kurdan re aştiyê çêbike.”
