Fabrîkaya Nanê Gel a ku ji aliyê Şaredariya Bismilê ve hatibû vekirin, rojê deh hezar nan çêdike û li 7 qadên cuda yên navçeyê digihîne welatiyan. Welatiyên ku nanê bi erzan û bi kalîte dikirin, dilxweşiya xwe tînin ziman.
Şaredariya Bismilê ya navçeya Amedê ji bo piştgiriya aboriya gel û peydakirina nanê bikalîte xizmeta ‘Nanê Gel’ berdewam dike. Fabrîkaya ku li ser rêya Bismil û Êlihê hatiye avakirin, di bin mercên paqijiyê yên herî bilind de dixebite. Tesîsa ku di 18ê Hezîranê de hatibû vekirin, di qonaxa yekem de rojê 10 hezar nanan çêdike û tê plankirin ku di rojên pêş de ev kapasîte hîn bêtir zêde bibe.
Nanê ku tê hilberîn li 7 bufe yên bi navê ‘Nanê Gel’ ku li cihên cuda yên navçeyê hatine danîn, ji welatiyan re tê firotin.
‘Nanê 7 lireyî alikariya aboriya malbatan dike’
Welatiyên ku ji ber fiyetê erzan û lezzeta nan dilxweş in derbarê xizmetê de axivîn û wiha gotin: “Em ji vê xizmeta şaredariyê gelekî memnûn in. Nan gelekî bi lezzet û bi kalîte ye. Em her serê sibehê ji van bufeyan nanê xwe dikirin. Fiyetê nan ku 7 lîre ye, alîkariyeke mezin dide budceya malbatan. Em dixwazin ev xizmet her berdewam bibe.”
