Şirnex – Dayika Orhan Tunç û Mehmet Tunç ên di jêrzemînên Cizîrê de hatibûn kuştin Esmer Tunç diyar kir ku heke Tirkiye bixwazê çareseriyê pêş bixîne divê kujerên jêrzemînên Cizîrê ceza bike û got: “Dilê me şewitî edî bila dilê dayikên din neşewite. Bila dayikên lêşkeran jî aştiyê bixwazin.”
Li navçeyên Cizîr ya Şirnexê di 14ê Kanûna 2015an de qedexeya derketina derve hat ragihandin. Di 79 rojan qedexeyan de 288 kes hatin kuştin. Li navçeyê bi sedan avahî xera bûn. Di ser qedexeyên derketina derva ya Cizîrê re 9 sal borîn. Lê kujerên kuştiyan hîn nehatin cezakirin. Tekildarî komkujiyên li Cizîrê parêzeran serî AYMê dan. Lê AYMê serîledan red kirin. Li ser vê yekê parêzeran serî li Dadgeha Mafên Mirovan a Ewropayê (DMME) dan. DMMEyê jî di 22ê gulanê de agahî ji Tirkiyeyê re şand û xwest têkildarî komkujiya li Cizêrê parastinê bike.
Yek jî ji kesên di dema qedexeyan de jiyana xwe ji dest da Hevserokê Meclîsa Gel a Cizîrê Mehmet Tunç û birayê wî Orhan Tunç bû. Dayika Mehmet Tunç û Orhan Tunç Esmer Tunç, li ser biryara DMMê û pêvajoya aştiyê ji Ajansa Welat (AW) re axivî. Esmer Tunç, anî ziman ku ji bo çareseriyeke mayindê pêşbikevê divê kujerên jêrzemînên Cizîrê jî bên cezakirin.
‘Bila dayikên lêşkeran jî aştiyê bixwazin’
Esmer Tunç ku di jêrzemînên Cizîrê de 2 zarokên xwe windakir û xaniyê wan hat şewitandin aştiyê dixwaze. Esmer Tunç ji dayikên lêşkeran dixwaze ku aştiyê bixwazin û dibêje: “Dilê me şewitiyê. Em naxwazin dilê dayikên din bişewite. Em aştiyê dixwazin. Dawiya şer aştiye. Divê hemû kes ser bisekine û aştiyek pêk bê. Kurd hemû jî aştiyê dixwazin. Divê dayikên lêşkeran jî bêjin em aştiyê dixwazin. Divê edî dilê tu dayikan neşewitê. Min 2 delalên xwe dan axê ez naxwazim edî dayik bigirîn. Hê 6 heyv çêbibûn ku min Orhanê xwe zewicandibûn. Xaniyê me şewitandin. Em koçber kirin. Her du zarokên min kuştin. Edî bes e. Bila xwîn nerije. Herî zêde dayik aştiyê dixwazin. Bila dayikên lêşkeran jî dengê xwe bilind bikin û aştiyê bixwazin. Em weke dayikên Kurdan û Tirkan destê xwe bidin hev û bi hev re aştiyê bixwazin.”
‘Kujeran ceza bikin’
Di berdewama axaftina xwe de Esmer Tunç bal kişand ser biryara DMMê û wiha pê dê çû: “Ew çend sal bûn em li bendê bûn. Dadgeha Ewropa hê nû ji Tirkiyeyê bersiv xwest. Ji bo aştiyek pêk bê divê kujerên kesên di jêrzemînên Cizîrê de hatinê kuştin jî bên dîtin û cezakirin. Bi sedan kes di jêrzemînên Cizîrê de hatin şewitandin. Ev nayê jibîrkirin. Divê kujerên jêrzemînên Cizîrê, yên Roboskî û yên hemû komkujiyên din bên ronîkirin û cezakirin. Divê çareseriyek pêş bikeve û ew komkujî jî derkevin hole. Cizîra Botan çi kiribû ku ew yek ji serê me de hat. Cizîr kirin hedef û ew qas kes li Cizîrê kuştin.”
Ketina gundê wan qedexe ye
Di dawiya axaftina xwe de Esmer Tunç destnîşan kir ku ji bo pêvajo pêşbikeve divê dewlet jî gavên şênber bavêje û got: “Divê dewlet jî gavan bavêje. Em dixwazin bi zimanê xwe bijîn. Em dixwazin li welatê xwe azad û wekhev bijîn. Gundê me Cifena qedexe ye. Niha mirov nikare têkeve gund. Em dixwazin bi awayekî serbest biçin gundê xwe. Erd û mala me li wir e. Lê ji bo ku em biçin gundê xwe û li ser erdê xwe destûr dixwazin. Ji bo aştiyê divê qedexeyên li ser welat û zimanê me jî rabe. Divê xweşî û aramî pêk bê.”
