Serokê Şaxa Komeleya Mafên Mirovan (ÎHD) Ercan Yilmaz da zanîn ku pêvajo encax bi baweriya gel dê pêş bikevê û wiha got: “Ji bo pêvajo pêş bikeve divê hemû girtiyên siyasî bêne berdan.”
Rêberê Gelê Kurd Abdullah Ocalan di 27ê Sibata 2025an de banga Aştî û Civaka Demokratîk kir. Piştî banga Rêberê Gelê Kurd Abdullah Ocalan PKKê xwe fesix kir, hêza xwe ya Tirkiye paşyve kişand. Lê ji bo mafê hiqûqî û siyasî heta niha ji aliyê dewletê ve gavên şênber nehatine avêtin. Serokê Şaxa ÎHDê ya Amedê Ercan Yilmaz têkildarê geşedanên rojevê, mafê hêviyê, polîtîkayên li ser girtigehan nirxand.
‘Divê girtîgeh bên vala kirin’
Ercan Yilmaz anî ziman ku 50 salan in polîtîkayên dewletê ya li ser girtîgehan neguheriye û got: “Her çiqas deshilatdar biguherin jî polîtîkayan girtîgehan ên berê didome. Dewleta Tirk girtîgehan wekî cihên îslehê dibîne. Dixwaze girtiyan bi tuniyê îslah bike. Mafê girtiyan asteng dike. Zêdetir 50 sal in şerekî giran li Kurdistanê û Tirkiyeyê heye. Di vê pêvajoyê de bi hezaran Kurd hatin girtin. Hê jî bi hezaran Kurd di girtîgehan de ne. Girtiyên nexweş nayên berdan. Di vê pêvajoyê de divê berî her tiştî hemû girtiyên siyasî bêne berdan. Ji bo aştiyê divê hemû girtiyên siyasî bêne berdan.”
‘Divê pêvajo li ser zimanê aştiyê bimeşê’
Ercan Yilmaz diyar kir ku hewceye zimanê dewletê bê guherandin û got: “Saleke dawî şer rawestiya ye û gerîla, leşker û polis nayên kuştin. Ev tiştekî gelek girîng e. Îro divê pêvajo li ser zimanê aştiyê bimeşê. Provakator herdem hebûn. Dijûn û çêrên li dijî Leyla Zana ji aliyê kesên çareseriyê naxwazin ve pêş ket. Li vir tiştên herî girîng dewlet dê çawa tevbigere ye. Lê me dît ku dewlet hê jî di pêvajoyê de ne xwedî biryar e. Îro hewce bû biryarên Dadgeha Mafê Mirovan a Ewropa yê ku li ser mafê hêviyê pêk hatibûya. DMME ji bo birêz Abdullah Ocalan û siyasetmedarên Kurd biryar daye. Lê heta niha Tirtiye gav neavêtiye.”
‘Hewceye gav bên avêtin ku gel jî ji pêvajoyê bawer bike’
Ercan Yilmaz destnîşan kir gel ji pêvajoyê bawer nake û got: “Hê jî baweriya gel bi dewletê nayê. Bi avêtina gavên hiqûqî û siyasî ku mafan diparêze dê aştiyek bi rûmet û mayîn de pêk bê. Hewceye gav bên avêtin ku gel jî ji pêvajoyê bawer bike. Divê dewlet nasnameya gelê Kurd û vîna Rêberê Gelê Kurd nas bike. Divê dewlet êdî zagonên xwe li ser esasê parastina mafan biguherîne.”
