Encamnameya Konferansa ‘Jenosîd û Entegrasyona Demokratîk a Şengalê’ ku duh hat lidarxistin, bi raya giştî re hat parvekirin. Di encamnameyê de hatiye gotin ku di serî de dewleta Iraqê divê hemû dewlet jenosîdê nas bikin û qanûna jenosîdê pêk bînin.
Duh li Geliyê Kersê yê Çiyayê Şengalê, ji aliyê Akademiya Zanistên Civakî ya Abdullah Ocalan ve kongreyek bi boneya 12yemîn salvegera fermanê, bi dirûşmeya ‘Edaleta Veguhêz Wê Bibe Bingeha Entegrasyona Demokratîk’ û bi beşdariya 200 kesan pêk hat. Di konferansê de 3 panelên taybet bi rewşa civaka Êzidî hatin dayîn. Îro jî encamnameya konferansê bi raya giştî re hat parvekirin.
Encamnameya ku ji aliyê Akademiya Zanistên Civakî ya Abdullah Ocalan a Şengalê ve hat ragihandin, wiha ye:
“Em wekî gelê Êzidî bi hezaran sal in rastî qirkirin û fermanan tên. Heta niha jî êriş li ser me qut nebûne. Bi van êrişan erdnîgariya me parçe parçe kirin, em ji welatê me dûr kirin. Hejmareke ne diyar şehîd û windayiyên me çêbûn. Xwestin zimanê me tune bikin, baweriya me bişkînin. Bi hezaran sal in li ser çand û nasname me êriş hene. Ev êriş di bin gelek maneyên cuda de çêbûne. Hinekan xwestin me bikin eskerên xwe, hinekan jî xwestin gund û çiyayên me ji me bistînin û hinekan jî xwestin baweriya me bidin guhertin. Lê di esas de armanca her yek ji wan êrişan tunekirina hebûna me bû.
Herî dawî di 3yê Tebaxa 2014an de fermana hat serê me ji hemû fermanên din cudatir bû. Li pêş çavê hemû dinyayê bi îxanet û hevkariya gelek dewlet û aliyan yek ji êrişên herî hovane bû ku di dîrokê de nehatiye dîtin. Hemû pîrozî, civak û warê me ket ber vê êrîşê. Hezaran zarok û jin hatin revandin, bi hezaran însan hatin qetilkirin û bi sedhazaran însanên me koçber bûn. Jin û zarok di bazaran de hatin firotin. Hîn bi hezaran şehîdên me di gorên komî de ne. Teslîmkirina hestiyên me li me dikin wek îşkenceyê. 12 sal ser jenosîdê re derbas bû lê hîn cenazeyên me li erdê ne. Bi sedhezaran însanên me hê jî di kampan û welatên cuda de nikarin vegerin welatê xwe. Hîn kavilên xaniyên me li erdê ne. Yek sûcbar nehatiye cezakirin. Berovajî ew kes hê jî weke gefekê li derdora me hatine bicihkirin. Şengal hê jî bê statu ye. Zarokên Şengalê ku dixwazin gelê xwe biparêzin ji gelek aliyan ve rastî êrîşan tên.
Ev konferansa îro ku hemû aliyên Êzidî yên welat û derveyî welat, bi dostên xwe yên ji Iraqê bigire heta Ewropa û welatan nîşan da ku îradeye Êzidî û dostên xwe daniye holê îradeya çareseriyê ye. Dîsa bi rêya vê konferansê em dixwazin ji bo pêçandina birînên me hemû aliyên peywendîdar bi erka xwe rabin. Di serî de dewleta Iraq û hemû dewlet jenosîdê nas bikin û qanûna jenosîdê pêk bînin. Îrade, nasname û baweriya me qebûl bikin ku em îro dixwazin bi entegrasyoneke demokratîk mafê xwe mîsoger bikin. Çawa ev civak dewleta Iraqê dewleta xwe dibîne dewleta Iraqê jî divê vî gelî bê cudahî weke pêkhateya xwe ya esasî bibîne.
Dîsa di vê konferansê de ji bo pêşîgirtina qetlîamên nû girîngiya yekîtî û sazîbûna gelê Êzidî hatiye niqaşkirin û ji bo demên pêş biryarên girîng hatine girtin. Bi taybet ji bo pêkanîna qanûna jenosîd li welat û derveyî welat biryara mezinkirina têkoşîn û sazîbûnê hatine girtin. Dîsa bi desteka dost û hevalên xwe ji bo entegrasyoneke demokratîk ku weka projeya çareseriya ji bo Rojihilta Navîn ku Rêber Apo pêşkêş kiriye civaka Êzidî jî dikarin hebûn, çand û baweriya xwe biparêzin bi hemû aliyan re hatiye nîqaşkirin û biryara ketina tevgerê hatiye girtin.
Civaka Êzidî li gor qanûnên ku zemîna çareseriyê têde heye, mekanîzma werin avakirin da ku karibe nexşerêya entekrasyona demokartîk dayîne holê, ne siyaseta ku di helîne, entegrasyoneka demopokartîk ku di nava xwe de dihewîne.
Li ser vî esasî di konfiransê de gelek biryarên girîng hatin girtin ku ji vê demê û şûnde kar û xebat li ser wan kirin û civaka Êzidî xwe bi xwe çarenûsa xwe diyar bike;
1- Ew konferans wekî yekemîn konferansa jenosîd were qebûlkirin û di salên pêşiya me de dewam bike.
2- Ji bo jenosîd were naskirin saziyeke ji bo vî karî rabe were avakirin.
3- Ji bo arşîva fermanê ku niha ne di destê gelê Êzidî de ye, xebat were meşandin û komkirin.
4- Ji bo şopên fermanê neyên jibîrkirin Şengala kevn wekî Mûzaxane were tenzîmkirin.
5- Ji bo jinûva avakirina Şengalê bi hemû aliyên peywendîdar re têklilî were danîn.
6- Ji bo misogerkirina mafê gelê Êzidî pêkanîna entegrasyonekî demokratîk xebat werin xurtkirin.
7- Ji bo naskirina jenosîdê di hemû aliyan de xebat meşandin.”
