Di sêyemîn rûniştina doza Ayşe Tokyaz a li Stenbolê hat kuştin de, dozgerî der barê gumanbar Cemîl Koç de daxwaza cezayê muebeta giran kir. Dadgehê ji bo temamkirina parastinan rûniştin taloqî 9’ê îlonê kir.
3yemîn rûniştina doza Ayşe Tokyaz ya ku li navçeya Kuçukçekmece ya Stenbolê ji aliyê polîsê berê gumanbar Cemîl Koç ve hat kuştin, li 2yemîn Dadgeha Cezaya Giran a Edliyeya Kuçukçekmeceyê hat dîtin. Parêzerên aliyan, malbata Ayşe Tokyaz di rûniştinê de amade bûn û gumanbar Cemîl Koç jî bi SEGBÎS’ê tev li rûniştinê bû. Her wiha Platforma Em ê Kuştinên Jinan Rawestînin, Femînîstînen li Dijî Qetilkirinên Jinan, Baskê Jinan a CHPê û gelek jin tevli bûn.
Beriya rûniştinê jî li ber edliyeyê ji aliyê jinan ve daxuyaniyek hat dayîn. Piştre derbasî salona rûniştinê bûn.
Dozger mutala xwe ya der barê gumanbar de pêşkêş kir û ji sûcê ‘kuştina bi plankirî’ cezayê meubeta giran xwest. Dozger da zanîn ku gumanbar cînayet berê plan kiriye û piştre jî hewl daye cenazeyê veşêre.
Parêzerên bersûc îtîrazê mutalayê kirin û berat xwestin. Dadgehê rûniştin taloqî 9ê îlonê kir.
