Navenda Nûçeyan – Santralên Hîdroelektrîkê ku bi boneya ewlehiyê yên li ser sînorê bakur û başûrê Kurdistanê hatine çêkirin, ji aliyê Serokê Navçeya Navendî yê Şirnexê yê AKPê Rahmet Taşar ve ji dewletê hatin kirîn.
Dewleta Tirkiyeyê li Şirnexê bi taybetî jî li navçeya Qilebanê ji sala 2019an pê ve dest bi çêkirina Santralên Hîdroelektirêkê (HES) kir. Bi taybetî jî li ser sînorê bakur û başûrê Kurdistanê ev HESên ewlehiyê ava kirin û bi vê yekê talaneke zêde li ser xwezaya herêmê pêk anî. Her çiqas ev HES bi pereyê dewletê hatibin çêkirin jî bi demê re car din fêhl û finazên endamên AKPê li vê derê jî ketin meriyetê.
HESên ewlehiyê bû cihê ranta rêveberê AKPê Rahmet Taşar
Di vê nûçeyê de em ê qala Serokê navçeya navendî ya Şirnexê yê AKPê Rahmet Taşar bikin. Dema ku dewletê li herêmê dest bi çêkirina HESan dike rêveberên AKPê yên Şirnexê ji bo kirîna van HESan dikevin nava tevgerê û destpêkê Rahmet Taşar ji HESeka temam bûyî sedî 25 ji dewletê bi pereyek gelekî kêm dikire. Piştre ji HESeke din jî ji sedî 25 dikire û dema HESên ewlehiyê xilas dibin û elektrîkê çêdikin êdî Rahmet Taşar jî bi mîlyonan pere ji van HESan digire. Rahmet Taşar ê ku berê ji aliyê aborî ve weke her malbateke ji rêzê bû îro bûye xwediyê mîlyonan lîre.
Rêveberê AKPê û endamê FETOyê li ser heman zeviyê projeyê çêdikin
Piştî ku Rahmet Taşar baş fêrî feydeyê fêhl û finazên rantê bû, îcar serî li projeyên bi pereyê dewletê tê çêkirin da. Di sala 2025an de Rahmet Taşar li ser navê şirîkê xwe Velî Arka ku ew jî rêveberê AKPê yê Şirnexê ye serî li projeya xwedîkirina sewalan dide. Di vê projeyê de Rahmet Taşar û şirîkê wî Velî Arka ne bi tenê ne. Li gel wan Serokê berê yê AKPê yê Şirnexê Mehmet Demîr ku ji doza FETOyê 8 salan di girtîgehê de maye, Serokê AKPê yê Şirnexê Halîl Îbrahîm Erkan, rêveberê AKPê yê Şirnexê Ûgûr Kaya, Rêveberê AKPê yê Şirnexê Serhat Hazar, Rêveberê AKPê yê Şirnexê Serhat Bîrlîk hene û projeya wan a ku dê li Taxa Nasirhan a bajaroka Dêrgulê ya Şirnexê were çêkirin di demek kurt de ji aliyê Wezareta Çandinî û Daristanê ve hate erêkirin.
Pereyê C.G., ketiye hesabên rêveberên AKPê û xwarine
Piştî ku projeya Rahmet Taşar û rêveberên AKPê yên din tê erêkirin ji bo avakirina govên-axurên sewalkariyê îhale tê çêkirin. Welatiyê bi navê C.G., îhaleya çêkirina 7 govên sewalkariyê digire û sala 2025an dest bi çêkirina van govên sewalkariyê dike. Bi demê re Rahmet Taşar û rêveberên AKPê yên şirîkên govên sewalkariyê ji dewletê 70 mîlyon TL distînin û pereyê ku bidin C.G., radestî wî nakin. Li şûna pere bidin C.G., çek didinê û dema projeya çêkirina govên sewalkariyê xilas dibe, C.G., berê xwe dide bankayan û dibîne pereyê çekên wî nehatine razandin. Dema C.G., pirsa pereyê xwe dike haya wî jê çêdibe ku ev pere ketine hesabên van kesan ê bankayan û Rahmet Taşar û hevalên xwe ev pere xwarine.
‘Fatûreyan zêde nîşan dan ku proje belaş ji wan re çêbibe’
Li gor çavkaniyên me yên ku ji ber ewlehiyê nexwestin navê xwe bidin; ev projeya çêkirina 7 govên sewalkariyê ji sedî 75 bi hîbeya Wezareta Çandinî û Daristanê hatiye çêkirin. Lê Rahmet Taşar û şirîkên xwe di fatûreyên çêkirina projeyê de pereyek ewqas zêde daye nîşandan ku çêkirina vê projeyê li ser wan belaş sekiniye. Her wiha dîsa li gorî çavkaniyan; ji ber ku projeya sewalkariya ya Rahmet Taşar ne li gorî rê û rêbazên projeyên bi hibe hatiye çêkirin dibe ku proje ji binî were betalkirin û wezaretê ev pereyê ku rêveberên AKPê xwarina ji wan bixwaze. Lê di nav gelê Kurd de gotinek a mezinan heye, “Kero nemire heya bihar tê” tîne bîra mirov. Îcar heya ku Wezareta Çandinî û Daristanê li ser mijarê raweste dê gelek fêhl û finazên din li ser ser vê projeyê li pêş bikevin.
Sibê: Namzetê AKPê yê Cizîrê bi tapûyên sexte mîlyonan lîre pere wergirt.
