Stenbol – Endama Înîsiyatîfa Yekîtiya Demokratîk û îmzakara “Di Sedsaliya Duyemîn de Konferansa Veguherîne Komara Demokratîk” Dîba Keskîn diyar kir ku li Rojhilata Navîn pergal diguherin, li cihekî guherandin hebe ew jî bondorê dide cîranên xwe û wiha got: “Ev sed sal in, di vê komarê de pirsgirêk hene. Ev sed sal in komar bi xwe re êş û kul anî. Êdî nabe ku di sedsala duyemîn de heman êş bên kişandin.”
Di 13 û 14ê Hezîranê de li Stenbolê bi tevlibûna siyasetmendar, rewşenbîr, nivîskar, akademîsyen û gelek kesan “Di Sedsaliya Duyemîn De Konferansa Veguherîna Komara Demokratîk” hate lidarxistin û li ser guherandina komarê gotarên girîn pêşkêş kirin û axivîn. Endama Înîsiyatîfa Yekîtiya Demokratîk û îmzakara konferansê Dîba Keskîn jî derbarê guherandina komarê de ji Ajansa Welat re axivî.
‘Guherandina pergaleke wisa bi rehetî pêk nayê’
Dîba Keskîn destnîşan kir ku di konferansê de nîqaşên gelek girîng pêk hatin û got: “Ez ê daxwaz bikim ku nîqaşên li vir weke pirtûk bê çapkirin. Ev pirtûk jî dê bibe diyariya dîrokê. Rastî jî em di rojên dîrokî de derbas dibin û guherandinên girîng pêk tên. Guherandina pergalekî wisa bi rehetî pêk nayê. Îro 85 milyon mirov nikarin li vî welatî bijîn. Xetimandinek heye, ev xetimandin di destûra bingehîn de heta îro cihe xwe negirtiye. Wekhevî hê nehatiye sazkirin. Li Rojhilata Navîn pergal diguherin, li cihekî guherandin hebe ew jî bondorê dide cîranên xwe. Ev sed sal in di vê komarê de pirsgirêk hene. Li vî welatî gelek netew bi hev re dijîn lê bi navê yek netewî dijîn. Di nav xwe de alozî û xitimandinan aniye û didome û nerazîbûn heta îro hatiye. Di vî welatî de mirovên demokrat, rewşenbîr û zana ji welatê xwe hez dikin. Îro gihiştiyê wê astê ku ji nîvî zêdetirê vî welatî guherandinê dixwaze. Êdî hewceye ev guherandin pêk were, jixwe bingeha guherandinê jî heye. Lê ya girîng ew e ku ev guherandin dê çawa pêk were?”
‘Komar ne demokratîk e’
Dîba Keskîn di berdewamiya axaftina xwe de diyar kir ku ev konferans di esesê xwe de li ser bingeha guherandinê pêk hat û wiha pê de çû: “Navê konferansê jî guherandina komara demokratîk e. Komar ji berê ve heye lê belê ne demokratîk e. Nîqaş jî li ser vê pêk tên. Gelek kesên rewşenbîr, zana, akademîsyen, nivîskar û siyasetmedar du rojan li ser guherandina komarê sekinîn û nêrînen xwe anîn ziman. Ev nêrîn li ser du esasan pêk tê. Yek di sedsala yekemîn de jiyanekî çawa hebû, ya didoya jî di sedsala duyemîn de wê jiyanek çawa hebe û bandorek çawa bide komarê. Ya girîng ev e ku di sedsala duyemîn de guherandinek çawa çêbibe ye. Demekî dirêj e li Tirkiyeyê konferansek wisa berfireh pêk nehatibû.”
‘Armanca me guherandin e’
Dîba Keskîn bal kişand ser girîngiya guherandine komarê û ev yek anî ziman: “Ev sed sal in komar bi xwe re êş û kulan anî. Êdî nabe ku di sedsala duyemîn de ev komar heman êşan bîne serê netewan. Kêm hindik be jî lê navê komarê hebû, lê komar bi ser yek bawerî û netewî re hat heta îro. Lê di sedsala duyemîn de tu gel vê qebûl nake. Beriya ku komar were avakirin wê demê nirx û pîvanên demokrasiyê li cîhanê ewqas tune bû. Lê îro komar, demokrasî, wekhevî, ekolojî û aştî tê gotin. Berî sedsalan ekolojî di nava civakê de cih nedigirt. Lê îro ekolojî bandorek dide ser jiyana rojane. Çima êş û derdên berê berdewam bikin? Armanca me jî guherandina vê yekê ye. Hêvîdarim ku em ê vê guherandinê pêk bînin. Lê em dizanin ku zehmet e ji ber ku tu guherandin bi serê xwe pêk nehatiye. Ji ber ku çiqas demokrat û aştîxwaz hebin jî netewperest jî hene. Êdî rewş bûye şerê qencî û xirabiyê. Em bi bawer in ku em ê qenciyê bi ser bixin.”
