Nobeta Platforma Têkoşîna Li Dijî Tiryakê ya Şiyar Be ku li dijî tiryak û fihûşê daye destpêkirin di roja 6emîn de berdewam kir. Di nobetê de pisporên xizmetên civakî têkildarî bandora madeyên hişbir a li ser mirovan û têkoşîna li dijî madeyên girse agahdar kirin.
Nobeta ku Platforma Têkoşîna Li Dijî Tiryakê ya Şiyar Be li dijî tiryak û fihûşê bi dirûşma “Ne jehrê kedê hembêz bike” li Parka Rojava ya navçeya Peyasê daye destpêkirin di roja 6emîn de berdewam kir. Nûnerên partiyên siyasî, saziyên sivîl ên civakî, hevşaredar û endamên Meclisa Ciwanan a DEM Partiyê tev li bûn. Ji girseyê hin kesan pêşmalkên li ser “Şiyar be” dinivîsî li xwe kirin.
Polîsan dest danî ser pankarta ciwanan
Li qada nobetê pankartên “Em rê nadin tiryakê” û “Ne hişbirê, kedê hembêz bikin” hatin daliqandin. Polîsan pankarta “Em di jiyana sosyalîst de israr dikin bi Rêbertiya Azad re xwe bi rêxistin dikin” ku Meclisa Ciwanan a DEM Partiyê li parkê daliqandibû bi hinceta dozgeriyê qedexe kiriye desteserkirin. Di vê kêliyê de di navbera ciwanan û polîsan de nîqaş derket û gengeşî çêbû. Polîsên ku ciwan derbkirin dest danîn ser pankartê.
Ciwanan li dijî vê yeke stran gotin û dirûşma “Bijî berxwedana ciwanan” berz kirin. Ciwanan dû re govend gerandin, gelek kesên ku tev li nobetê bûyî jî bi ciwanan re govend gerandin.
Pisporan qala bandora madeyên hişbirê kirin
Dû re pisporên xizmetên civakî yên Navenda Perwerdehî û Şêwirmendiya Bengîtiya Madeyê ya Şaredariya Bajarê Mezin a Amedê têkildarî tiryak û cureyên wê axivîn. Pisporan qala bandora madeyên hişbir ên li ser kesên wan bikartînin kir û divê çawa li dijî vê têkoşîn bê dayîn vegotin. Dûre pisporan pirsên kesên tev li nobetê bûyî bersivandin.
