Li Wanê 7 saziyên mafên mirovan, li dijî îşkenceya li girtiyê siyasî Nevzat Oren hatiye kirin dan zanîn ku Nevzat Oren li ber çavê gel û di korîdorên nexweşxaneyê de ji aliyê hêzên ewlehiyê ve hatiye derbkirin û gotin: “Bila derbarê van personel û berpirsiyarên îşkenceyê de lezgînî lêpirsîna edlî û îdarî bê destpêkirin.”
Şaxên Komeleya Piştgirî û Piştevaniya bi Malbatên Girtî û Hukumdaran re (TUHAY-DER), Komeleya Hiqûqnasên ji bo Azadiyê (OHD), Komeleya Mafên Mirovan (ÎHD), Sendîkaya Kedkarên Saziyên Tenduristî û Xizmetên Civakî (SES), Nûnertiya Weqfa Mafên Mirovan a Tirkiyeyê (TÎHV), Baroya Wanê û Odaya Tabîban a Wan-Colemêrgê yên Wanê li ber Girtîgeha Tîpa F a Wanê derbarê îşkenceya li ser girtiyê siyasî Nevzat Oren hatiye kirin daxuyanî dan. Di daxuyaniya pankarta “Bila îşkenceya li girtîgehan bi dawî bibe, berpirsiyar werin darizandin” hat vekirin û dirûşma “Bijî bexwedana zîndanan” hat berzkirin. Rêveberên saziyan, parlamenterên DEM Partiyê yên Wanê, malbata Nevzat Oren û gelek xizmên girtiyan tev li çalakiyê bûn.
Daxuyaniyê rêveberê TUHAY-DERê Nedîm Şipal xwend.
‘Bijîşk daxwaz nekir, cendirmeyan ferz kir’
Nedîm Şîpal bi bîr xist ku Nevzat Oren ji ber pirsgirêkên tenduristiyê birine nexweşxaneyê lê rastî sepana muayeneya bi kelepçe hatiye û diyar kir ku tevî ku bijîşk daxwazeke wiha nekiriye jî, jandarmayan ferz kiriye ku Oren bi kelepçeyî bê muayenekirin û wiha axivî: “Li ser redkirina vê sepana ku rûmeta mirovahiyê bin pê dike, Nevzat Oren li ber çavê gel û di korîdorên nexweşxaneyê de ji aliyê hêzên ewlehiyê ve hat derbkirin. Tevî ku bênçikiya giran a girtî hebû û daxwaza alîkariyê kir, deriyê wesayîta ringê nehat vekirin û di cîhekî bêheva de hat hiştin.”
‘Lêdan hat belgekirin’
Di berdewamiya axiftina xwe de Nedîm Şîpal destnîşan kir ku Nevzat Oren piştî îşkenceyê di rewşeke wisa de bû ku rêveberiya girtîgehê ew bi wî halî qebûl nekir û ew ji bo rapora derpkirinê careke din şandiye li nexweşxaneyê. Nedîm Şîpal da zanîn ku derbkirin û îşkenceya li hemberî Nevzat Oren hatiye kirin bi rapora nexweşxaneyê hatiye belgekirin û wiha berdewam kir: “Oren piştî ku vegeriya girtîgehê rasterast serlêdana sûc kir. Bila derbarê personelên ku ketiye nav van kirinan û berpirsiyarên îşkenceyê de lezgînî lêpirsîna edlî û îdarî bê destpêkirin. Dîmenên kamerayên ewlehiyê yên nexweşxaneyê û qeydên hundir û derveyî wesayîta rîngê, bêyî ku werin reşkirin, bên lêkolînkirin. Bila sepana muayeneya bi kelepçe ku veguheriye binpêkirina mafan a rojane lezgînî bê rawestandin.”
Nedîm Şîpel di dawiya axaftina xwe de ragihand ku ew ê bibin şopînerên pêvajoya hiqûqî û rewşa tenduristiyê ya Nevzat Oren.
Daxuyanî bi dirûşmeyan bi dawî bû.
