Di daxuyaniya ku li ser navê Hikûmeta Demkî ya Sûriyeyê hate weşandin de nexşeyeke ku Girên Golanê derveyî Sûriyeyê dihêle hate bikar anîn. Ev yek bû sedema rexneyên wekî, “Golanî dest ji Golanê berda”.
Hikûmeta Demkî ya Sûriyeyê bi boneya rakirina pêdankirinên DYAyê yên li ser Sûriyeyê daxuyaniyek weşand. Di daxuyaniyê de nexşeya Sûriyeyê û ala nû ya Sûriyeyê bi gotina, “Sûriyeya ji pêdankirinan azad” cih girt. Lê di nexşeya li ser navê Hikûmeta Demkî hate weşandin de xaleke girîng bala welatiyên Sûriyeyê kişand. Di nexşeyê de Girên Golanê ku ji Şerê 6 Rojan ê di navbera Yahûdî û Ereban yê sala 1967an heta niha di bin destê Îsraîlê de ye cih negirt. Heta niha Sûriyeyê hebûna Îsraîlê ya li Girên Golanê mîna dagirkeriyê bi nav dikir û di nexşeya Sûriyeyê de diparast. Yekem car e Hikûmeta Demkî di daxuyaniyeke fermî weşandî de nexşeyekê de Golan hatiye derxistin.
Trump: Min Golan da Îsraîlê
Di serdema xwe ya yekemîn de Serokê DYAyê Trump bi biryarnameyekê Golan wekî axa Îsraîlê naskiribû. Sê roj berî niha jî Trump di daxuyaniyekê de behsa Golanê kiribû û wiha gotibû: “Kesê/î bawer nedikir ku Golan bibe ya Îsraîlê. Lê min pêk anî. Min Golan da Îsraîlê. Piştre min bihîst ku cihek bêhempa ye û bi katrîlyon dolaran dike. Min bizanibiya min ê li hemberî wê tiştek bixwesta.” Piştî vê daxuyaniya Trump û rakirina pêdankirinên CAATSAyê weşandina vê nexşeyê bû sedema şîroveyên, “Ahmet eş-Şara ango bi nasnav Golanî axa Sûriyeyê radestî Îsraîlê kir û dest ji Golanê berda” hatin kirin. Her wiha Şara bi teslîmbûyîna Îsraîl û Amerîkayê hate sûcdarkirin.
