Her ku şer dirêj dibe lêgerîna ji bo muzakereyan jî zêde dibe. Ajansên Amerîkayê diyar kirin ku di navbera her du aliyan de muzakereyên bi rêya peyaman didome.
Li gorî agahiyên ku malpera nûçeyan ya Axios parve kirine, Dewletên Yekbûyî yên Amerîkayê (DYA) û Îran li ser planeke agirbestê ya du qonaxî nîqaş dikin. Hat ragihandin ku ev muzakere bi navbeynkariya Tirkiye, Pakistan û Misirê bi awayekî nepenî têne meşandin.
Muzakereyên bi rêya ‘peyamên kin’ didomin
Çavkaniyên agahdar diyar dikin ku Nûnerê Taybet yê DYAyê Steve Witkoff û Wezîrê Karên Derve yê Îranê Abbas Arakçî, bi rêya peyamên telefonê (SMS) daxwazên xwe digihînin hev. Ev yek nîşaneya hewldaneke dîplomatîk ya lezgîn e ku ji ber ultîmatoma Trump a 48 saetan bi dawî bibe.
Plana du qonaxî û agirbesta 45 rojan
Li gorî plana ku li ser maseyê ye, qonaxa yekem agirbesteke 45 rojî dihewîne da ku derfet ji bo muzakereyên aştiya mayînde çêbibe. Navbeynkar di wê baweriyê de ne ku tenê peymaneke wiha, dikare bibe sedema vekirina Tengava Hurmizê û çareserkirina krîza uranyumê.
Îran garantiya ‘mayînde’ dixwaze
Çavkaniyên Axiosê destnîşan dikin ku Îran naxwaze rewşeke mîna Xeze an Libnanê dubare bibe. Tehranê bi eşkere diyar kiriye ku ew “agirbesteke li ser kaxezê” ya ku tê de DYA û Îsraîl kengî bixwazin dîsa êrîş bikin, qebûl nakin. Îran di berdêla agirbesta 45 rojî de, naxwaze hemû kozên xwe (Hurmiz û Uranyum) yekser ji dest bide.
Ji bo peymanê 48 saetên dawî
Navbeynkaran hişyarî da rayedarên Îranê ku êdî wext nemaye û ev 48 saetên pêşiya me şansa dawî ye ji bo peymanê. Her çend çavkanî dibêjin şansê peymanê kêm e jî, lê ev yekane rê ye ku pêşî li karesateke mezintir û berfirehbûna şer bigire.
