Li gorî kampanyaya “Sêşema ji Cezayê Darvekirinê re Na” ji serê salê ve li Rojhilatê Kurdistanê û Îranê, 424 kes hatine bidarvekirin.
Kampanyaya “Sêşema ji Cezayê Darvekirinê re Na” ku ji hêla girtiyên siyasî yên li 38 girtîgehên Rojhilatê Kurdistanê û Îranê ve hatiye destpêkirin, di hefteya 75an de, derbarê darvekirinan de daxuyaniyek belav kir.
Li gorî daxuyaniyê di nava hefteyekê de 17 girtî ku yek ji wan jin e, li Rojhilatê Kurdistanê û Îranê hatine bidarvekirin.
Kampanyayê da zanîn ku ji serê sala 2025an heya niha, li Rojhilatê Kurdistanê û Îranê 424 kes hatine bidarvekirin.
Hate gotin ku roja Çarşema borî 3 kolberên Kurd ên bi navê Azad Şucaî, Idrîs Elî û Resul Ehmed bi tometa “sîxuriyê” hatine bidarvekirin.
Di heman daxuyaniyê de hate destnîşankirin ku li Îran û Rojhilatê Kurdistanê, pêlek binçavkirinê bi hêceta “siyasî û ewlekariyê” dest pê kiriye û pirraniya kesên tên binçavkirin, cezayê giran li wan tên birîn. Her wiha ji mafê xwe yê dadgehkirinê jî bê par tên hiştin.
Kampanyayê da zanîn ku ji her demê zêdetir niha jiyana girtiyên siyasî yên ku cezayê darvekirinê li wan hatiye birîn, di metirsiyê de ye û hate gotin: “Em bi gelê Kurd û Îranê re banga betalkirina cezayên darvekirinê û azadiya hemû girtiyên siyasî dikin.”
