Şirnex – Danişîna Nîhat Kazanhan ê ku polîs Mehmet Nûrbakî Goçmez ew kuştibû dê di 16ê Kanûnê de bê dîtin. Dayika Nîhat Kazanhan Ayşe Kazanhan xwest kujerê kurê wê demildest bê girtin û cezakirin.
Nihat Kazanhan ê 12 salî di 14ê Çileya 2015an de li navçeya Cizîrê ya Şirnexê ji aliyê tîme taybet Mehmet Nûrbakî Goçmez ve hat kuştin. 10 sal borîn, lê hîna polîsê kujer nehatiye cezakirin. Tevî kujer diyar e û şahid jî hene, lê hîna kujer serbest digere. 1emîn Dadgeha Cezayê Giran a Cizîrê ji bo polîsê kujer Mehmet Nûrbakî Goçmez cezayê mûebbetê birîbû. Lê bi “tehrîka neheq” û “daxistina ji ber rewşa baş” 13 sal û 4 meh cezayê wî daxistin û dadgeha bilind ceza erê kir. Lê piştî wê di danişîna 5emîn a doza Nîhat Kazanhan ku di 17ê Çileya 2024an de hat dîtin, dadger biryar da ku bi bultena sor li kujêr Mehmet Nûrbakî Goçmez bê girtin. Lê salek di ser biryara dadgehê re derbas bû jî kujer hê nehatiyê girtin.
Herî dawî danişîna doza Nîhat Kazanhan di 25ê Îlona 2024an de 1emîn Dadgeha Cezayên Giran a Cizîrê hate lidarxistin. Di danişînê de dadgehê ji bo kujerê Nîhat Kazanhan biryar da ku xwe li benda encamên biryara lêgerîna bi bûltena sor bigirin û danişîn taloqî 16ê Kanûnê kiribû. Danişîna 8êmîn a Nîhat Kazanhan jî wê sibe (16ê kanûnê) li 1emîn Dadgeha Cezayên Giran a Cizîrê bê dîtin. Beriya danişîna dayika Nîhat Kazanhan Ayşe Kazanhan ji Ajansa Welat re axivî û bi lêv kir ku ji ber Kurdbûnê kujerên kurê wê nayê cezakirin û xwest kujer bê cezakirin.
‘Wê rojê xaz neavetin lê Nîhat kuştin’
Dayik Nîhat Ayşe Kazanhan qala roja qetilkirina kurê xwe kir û destnîşan kir ku heta wê rojê polîsan her tim xaz davêt kolana wan û wiha got: “Wê rojê xaz neavetin kolanê lê Nîhat kuştin: “Wê rojê Nîhat ji dibîstanê hat malê. Min jî xwarin da wî. Piştre jî ji ber ku zarokekî me nexweş bû min ew bir nexweşxaneyê. Ez ji nexweşxanê vegeriyam malê. Lê Nîhat ne li malê bû. Min pirsa Nîhat kir. Wê rojê bavê Nîhat ji bo kar çûbû Başur. Piştî wê rojê êdî neçû Başûr. Ez derketim der û min pirsa Nîhat kir. Ji min re gotin xaz li Nîhat ketiyê û ew rakirine nexweşxanê. Ez jî bi lez çûm nexweşxaneyê. Min dît ku serê Nîhat pêçaye û deng ji wî nayê. Çavê min li Nîhat ket min kir hawar. Lê deng ji Nîhat nedihat bersiva min nedida. Piştre nehiştin ez biçim cem Nîhat. Ez jî li ser hişê xwe çûm. Dema min çavê xwe vêkir min dît serûm li pêya min xistine. Min pirsa Nîhat kir. Lê gotin Nîhat birine qata binî û kirinê morgê. Min serûm avêt û qêrîyam. Ez tu car wan rojan ji bîr nakim.”
‘Kujeran bi zanebûn nagirin’
Dayik Ayşe Kazanhan destnîşan kir ku ji ber ew kurdin kurê wê kuştin û wiha bertekên xwe anîn ziman: “Zarokê min Kurd bû. Ji ber wê kuştin. Tiştek tune bû. Zarokek bû. Sedema kuştina Nîhat tenê Kurdbûn bû. 10 sal in min aramî nedîtiye. Hezar nexweşî bi min re çûbûn. 10 roj piştî qetilkirinê kerna wî ji min re hat. Min ew kerneya wî vêşartiye. Bi sedan ên weke Nîhat hatinê kuştin. Em ê hertim şopdar bin. Heta kujer bêne cezakirin em ê têbikoşin. Dibêin bi bultena sor digerin, lê tev derew in. 10 sal in kujer serbest digerin. Em ê sibê dîsa biçin danişînê. Em dixwazin kujer ceza bikin. Bila zarokên din neyên kuştin. Em ê doza Nîhat bişopînin da ku kujer bên cezakirin. Ji bo kujer bêne cezakirin heta ku em sax bin em ê têbikoşin.”
Qeymaqam navê Cemîle Cagirga û Nîhat Kazanhan guncav nedît
Ayşe Kazanhan herî dawî anî ziman ku qeymaqamtiyê ji bo navê parqên Cemîle Cagirga û Nihat Kazanhan guncav nedît û wiha bi dawî kir: “”Çi zerara wê parqê heye. Tenê em û zarokên me kêfxweş bûn. Erê Nîhat edî nikarê li wê parqê bilîzê, Cemîle êdî nikarê li wê parqê bilîzê. Lê zarokên Cizîrê wê li wê parqê bilîzin. Ew jî zarokên me ne. Çima dibêjin ew nav neguncav e.”
