Rêxistina DEM Partiyê ya Karşiyakayê, têkildarî dirûşmeyên nîjadperest ên di maça Bandirmaspor û Amedsporê de daxuyaniyek da çapemeniyê. Di daxuyaniyê de bang li hikûmetê û hemû saziyên rayedar hat kirin ku li dijî sûcên nefretê helwesteke zelal nîşan bidin.
Rêxistina Partiya Wekhevî û Demokrasiyê ya Gelan (DEM Parti) a navçeya Karşiyakayê ya Îzmîrê, ji bo bertek nîşandana li dijî gotinên nîjadperest û êrîşên fîzîkî yên di maça 19ê nîsanê de li Bandirmayê li hemberî futbolîst û rêveberên Amedsporê pêk hatin, bi beşdariya koma “Barikat Ege” li avahiya navçeyê daxuyanî da çapemeniyê.
‘Ev mudaxaleya organîzekirî ya li dijî îhtimala aştiyê ye’
Metna daxuyaniyê ji aliyê Hevserokê DEM Partiyê Karşiyakayê Yaşar Şeren ve hat xwendin. Yaşar Şeren diyar kir ku maça li Bandirmayê “rojeke şermê” bû ku tê de nefreta organîze, nîjadperestî û provokasyona siyasî hebû. Yaşar Şeren da zanîn ku komeke bi navê alîgiran, bi awayekî sîstematîk çêrên giran, nîjadperest û cudaxwaz li nirxên gelê Kurd kirine û piştî maçê êrîşa fîzîkî li rêveber û lîstikvanên Amedsporê hatine kirin û got: “Pêvajoya ku di 27ê sibata 2025an de bi banga ‘Aştî û Civaka Demokratîk’ a Birêz Abdullah Ocalan dest pê kir, ji bo çareseriya demokratîk a pirsgirêka Kurd û aramiya civakî derfeteke nû afirandiye. Lê belê, çiqas kesên ji bo serkeftina vê pêvajoyê hewl didin hebin, ewqas jî kesên ku xwe bi şer, xwîn û dijminatiyê xwedî dikin û dixwazin vê zeminê sabote bikin jî hene. Tiştên li Bandirmayê qewimîn, tam jî mudaxaleyeke organîze ya van navendan e ku li dijî îhtîmala aştiyê pêk hatiye.”
‘Ne tenê Amedspor, gelê Kurd jî hat hedefgirtin’
Yaşar Şeren bal kişand ser wê yekê ku maç di TRT Kurdî de zindî hatiye weşandin û ev bûyer li ber çavê bi mîlyonan mirovî qewimîne û wiha lê zêde kir: “Yê ku hatiye hedefgirtin ne tenê Amedspor e, hemû gelê Kurd û vîna jiyana hevpar e. Ji ber vê yekê, hêviya raya giştî ya wekî ‘Divê Amedspor ji qadê vekişiya’ nîşaneyeke xurt e ku ev bûyer ne wekî rûdaneke werzişî ya asayî, her wiha wekî gefeke aşkere ya li ser pêvajoya aştiyê tê dîtin.”
Yaşar Şeren diyar ku ew ji raya giştî re radigihînin ew ê parastina aştî, wekhevî û hewldana jiyana hevpar bidomînin û got: “Ev xerabiya organîze ya li Bandirmayê, bi ruhê pêvajoya aştiyê re di nav nakokiyekê de ye. Divê destûr neyê dayîn ku qadên werzişê bibin cihê hilberîna nefret, nîjadperestî û çanda lîncê. Divê berpirsiyar demildest bên tespîtkirin û derxin pêşberî dadgehê. Nexwe, dê rûbirûbûna bi vê rastiyê re ku ev pratîkên nefreta organîze bêceza dimînin û bi awayekî neyekser tên teşvwîqkirin, bêçare be. Em tiştên qewimîn protesto dikin; em bang li hikûmetê û hemû saziyên peywendîdar dikin ku li dijî sûcên nefretê helwesteke zelal û cezakirî tev bigerin.”
