Enqere – Rêxistina DEM Partiyê ya Enqereyê di serdema nû ya perwerdehiyê de li ber Wezareta Perwerdehiya daxuyanî da û xwest perwerde bi zimanê dayikê bê dayîn û bêpere be.
Rêxistina DEM Partiyê ya Enqereyê, di serdema nû ya perwerdehiyê de bi daxwaza “perwerdehiya bê pere, zimanê dayikê û demokratîk” li ber Wezareta Perwerdehiya ya navçeya Çankaya ya Enqereyê daxuyanî da. Endam û nûnerên saziyên demokratîk jî tevlî daxuyaniyê bûn. Di daxuyaniyê de dovîzên li ser, “Perwerdehiya zimanê dayikê maf e” û “Divê di dibistanan de xwarina bê pere be dayîn” hat rakirin. Her wiha girsê dirûşmeyên, “Zimanê dayikê mafê nayê astengkirin” hat berzkirin. Metna daxuyaniyê ji aliyê endama Komîsyona Perwerdehiyê ya DEM Partiyê Sevîm Fîdan ve hat xwendin.
Sevîm Fîdan bi lêv kir ku xwendevan nikarin xwe bigihîn mafê xwarinê û got ku divê mafên bingehîn ên xwendevanan bi cih were. Sevîm Fîdan destnîşan kir ku ewlehî û dabînkirina pêdiviyên xwarinê ya xwendevanan di berpirsyariya dewletê de ye û wiha got: “Xwendevan ji ber nebûna şert û mercên wekhev ji mafê perwerdehiyê bêpar dimînin. Xwarina bê perê ne alikariya xwendevan e, lê mafê wan e. Divê tu zarok ji ber rewşa aborî rastî cudakariyê neyê û karibin ji mafê xwarinê sûdê bigirin.”
‘Perwerdehiya bi zimanê dayikê mafekî bingehîn e’
Sevîm Fîdan bal kişand ser mafê perwerdehiya bi zimanê dayikê û wiha dirêjî da axaftina xwe: “Tirkiye welatekî pir reng û ziman e. Divê ew pir rengî û zimanî di perwerdehiyê de jî bi cih were. Divê astengiyên li pêşiya perwerdehiya bi zimanê dayikê bê rakirin. Perwerdehiya bi zimanê dayikê mafekî bingehîn ê demokratîk e. Xwîşk û biratî ne tunehesibandina cudahiyan e lê bi awayekî wekhev bi hev re jiyan e. Li vî welatî ku baweriyên cuda hene perwerdehiya li ser yek olî li dijî mafê mirovan e.”
Pirsigrêkên perwerdehiyê
Sevîm Fîdan derbarê pirsgirêkên di perwerdehiyê de jî diyar kir ku xwendevan nikarin xwe bigihînin ava paqîj, di paqîjiyê de jî pirsgirêk hene û xwest ji bo paqîjiya dibistanan bûdçe were veqetandin. Sevîm Fîdan destnîşan kir ku bi Navenda Perwerdehiya Pîşeyî (MASEM) ve zarok weke karkerên erzan tên bikaranîn, zarok li ser kar jiyana xwe ji dest didin û karkeriya zarokan tê rêvekirin. Sevîm Fîdan bi lêv kir ku pirsgirêkên qada perwerdehiyê nayên çareserkirin û anî ziman ku ew ê her tim li rex daxwazên xwedevanan bin.
Daxuyanî bi berzkirina, “Bê ziman jiyan nabê” bi dawî bû.
