Amed – Endamê Komeleya Ekolojiyê ya Amedê Necdet Sezgîn têkildarî avakirina Meclisa Ekolojiyê ya Amedê diyar kir ku wan li dijî talankirina xwezayê Meclis ava kir.
Gelek ekolojîst û saziyên ekolojiyê 15ê Heziranê li Eywana Konferansê ya Tahîr Elçî ya Amedê bi şîara “Hişmendiya ekolojîk îdeolojiya sereke ya hişmendiyê ye” Meclisa Ekolojiyê ya Amedê îlan kir. Endemê Komeleya Ekolojiyê ya Amedê Necdet Sezgîn ji Ajansa Welat (AW) re axivî.
‘Ekolojîstan meclis ava kir’
Endamê Komeleya Ekolojiyê ya Amedê Necdet Sezgîn diyar kir ku Meclisa Ekolojiyê berê jî hebû lê demeke dirêj kar û xebat hatibû rawestandin û got: “Me nêzî 7 -9 mehan amadekariya meclisê kir. Gelek sazî, dezgeh û rewşenbir kom bûn. Kesên ku dixwazin pêşiya komkujiya xwezeya bigirin li vir cih girtine. Me bi hev re gelek civîn li dar xist. Me hewceyî bi meclisekê dît û me meclis ava kir. Li Amed, Kurdistan û tevahiya Tirkiyeyê talankirin, werankirin û qirkirina xwezayê bi awayekî hovanê didome. Lê li dijî vê yekê helwestek ekolojîstan a hevpar tune ye. Li dijî talankirina xwezayê têkoşin gelek qels bû. Em bawer in ku ev meclis bibe mînak. Em hevî dikin ku li bajarên din jî meclisên ekolojiyê bêne avakirin. Ev bibe sedema Konfederalîzma Meclisa Ekolojiyan. Em hevî û bawer dikin ku siberojê têkoşînek hevpar û yekgirtî derkeve holê.”
‘Xwezayê talan dikin’
Necdet Sezgîn destnîşan kir ku beriya şer jî şîrketên bazirganiyê xweza talan dikirin û got: “Bi destê kargehên pîşesaziyê xweza tê talankirin. Di şer de gelek teqemenî bikar anîn. Bi van teqemeniyan xwezayê wêran dikin. Di şerê ku li herêmê pêş dikeve jî her roj talankirin û qirkirina xwezayê bi awayekî hovanê didome. Îro şer didome. Xweza talan dibe. Li dijî vê yekê em wekî Meclisa Ekolojiyê ya Amedê dê bernameyên li dijî talankirinê bidin pêş xwe. Em dixwazin li Kurdistan, Tirkiye û hemû cîhanê aştiyêk mayînde pêk bê.”
